İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 279 Hüküm no: 255 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Linyo v. Nako’nun, kasap dükkanı gediğini Keriço v. Ziso’ya sattığı Kassab Mukābele şüd Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Hamid Hân -tâbe serâhu-hazretlerinin evkāf-ı hümâyûnları müstegallâtından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinde yedinci selhhâneye merbût İstanbul’da Hocapaşa’da sebîl karşısında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur vakıf âlât-ı lâzıme-i ma‘lûmenin nısf hisse-i şâyi‘asına bâ-temessük-ı mütevellî mutasarrıf olan Linyo v. Nako nâm zimmî İstanbul mahkemesinde meclis-i şer‘-i hatîrde hâlâ hâssa kasabbaşısı dergâh-ı âlî kapıcıbaşılarından es-Seyyid el-Hâc Mustafa Ağa tarafından mürsel kasablar kethüdâsı el-Hâc Hasan Ağa b. el-Hâc Osman ve sâir kasab ustaları hâzır oldukları hâlde kasab ustalarından bâ‘isü’l-i‘lâm Keriço v. Ziso nâm zimmî muvâcehesinde zikr olunan kasab dükkânı derûnunda mevcûde beyne’l-esnâf gedik [ta‘bîr] olunan vakıf âlât-ı lâzıme-i ma‘lûmeden ber-vech-i muharrer mutasarrıf olduğum nısf-ı âlât-ı lâzıme-i ma‘lûmemi hüsn-i rızâ ve tayyib-i hâtırım ve ferağ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm Keriço zimmîye ferağ ve tefvîz eylediğimde ol dahi tefevvüz ve kabûl ve hisse tevzî‘ini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d zikr olunan nısf hisse-i şâyi‘ada benim kat‘â alâka ve medhalim kalmayup mersûm Keriço zimmînin hakk-ı müfavvazı olmuşdur deyü ba‘de’l-ikrâr ve’t-tasdîk nısf âlât-ı lâzıme-i ma‘lûmeyi mersûm Linyo zimmî ferağından mersûm Keriço üzerine tahrîr ve defter-i vakfa kayd ile cânib-i vakf-ı müşârun-ileyhden yedine bir kıt‘a temessük i‘tâsı bâbında istid‘â-yı inâyet eylediği mahkeme-i merkūmeden huzûr [-ı âlîlerine i‘lâm olundu.] Fî 11 C sene 1237