İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 280 Hüküm no: 256 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya v. İstefan ile Melkon v. Kirkor’un, habbaz fırını ve değirmenini Ohannes ve Karabet’e sattıkları Habbâz ve değirmen Mukābele şüd Ma‘rûz[-ı dâ‘î-i devlet-i aliyyeleridir ki] Âsitâne-i aliyye -humiyet ani’l-âfât ve’l-beliyye-de vâki‘ habbâz esnâfından Serkiz v. Kirih nâm zimmî asâleten meclis-i şer‘-i münîrde yine esnâf-ı merkūmeden Ağya v. İstefan nâm zimmî kezâlik asâleten ve Melkon v. Kirkor nâm zimmî tarafından husûs-ı âtîde vekîl olduğu tüccârdan es-Seyyid el-Hâc Veliyüddin Ağa b. Ali ve Hatîbzâde es-Seyyid el-Hâc Hasan Ağa b. Ali nâm kimesneler şehâdetleriyle ber-nehc-i şer‘î sâbit olan hâlâ habbâzân kethüdâsı Mehmed Efendi b. Ali vekâleten hâzır oldukları hâlde yine esnâf-ı merkūmeden kendi nefsinden asıl ve şerîki Karabet v. Canik nâm zimmî tarafından husûs-ı âtîde tasdîka vekîl-i müseccel-i şer‘îsi Ohannes v. Avadis nâm zimmî muvâcehesinde kapan-ı dakīk tüccârından merkūmân es-Seyyid el-Hâc Veliyüddin Ağa ve Hatîbzâde el-Hâc Hasan Ağa ve Arabacı el-Hâc İbrahim Ağa ve Kozlucazâde el-Hâc İbrahim ve Kırımîzâde es-Seyyid el-Hâc Musa Ağa ve es-Seyyid el-Hâc İbrahim Ağa ve Uncular Kethüdâsı el-Hâc Mehmed Ağa ve nizâm ustalarından el-Hâc Ömer Ağa ile re‘âyâ nizâm ustalarından Usta Filibos ve Usta Agob ve Usta Minas nâm zimmîler kezâlik hâzır oldukları hâlde mahmiye-i mezbûrede Bahçekapısı hâricinde vâki‘ ma‘lûmü’l-hudûd bir bâb habbâz fırını ve ona merbût beş horoslu bir bâb değirmeni derûnlarında mevcûde beyne’l-hiref gedik tâ‘bir olunur yirmi re’s bârgir ve sâir âlât-ı lâzıme-i ma‘lûmesinden sekiz re’s bârgir ve onlara isâbet eden sâir âlât-ı lâzıme benim ve altı re’s bârgir ve onlara isâbet eden sâir âlât-ı lâzıme şerîkim hâzır-ı mersûm Ağya zimmînin ve altı re’s bârgir ve onlara isâbet eden sâir âlât-ı lâzıme diğer şerîkim müvekkil-i mesfûr Melkon zimmînin yedlerimizde mâlımız ve mülkümüz olmağla ben zikr olunan habbâz fırını ve değirmeni âlât-ı lâzıme-i ma‘lûmesinden akd-i âti’z-zikrin sudûruna değin ber-vech-i meşrûh yedinde mâlım olan sekiz re’s bârgir ve onlara isâbet eden sâir âlât-ı lâzıme-i ma‘lûmemi ve şerîkim hâzır-ı mersûm Ağya zimmî kezâlik yedinde mâlı olan altı re’s bârgir ve onlara isâbet eden sâir âlât-ı lâzıme-i ma‘lûmesini ve diğer şerîkim müvekkil-i mersûm Melkon zimmî dahi kezâlik yedinde mâlı ve mülkü olan altı re’s bârgir ve onlara isâbet eden sâir âlât-ı lâzıme-i ma‘lûmesinden dört re’s bârgir ve onlara isâbet eden sâir âlât-ı lâzıme-i ma‘lûmesini yedinde ibkā ve mâ‘adâsı olan ancak iki re’s bârgir ve onlara isâbet eden sâir âlât-ı lâzıme-i ma‘lûmesini ki zikr olunan bir bâb habbâz fırını ve beş horoslu değirmenden cem‘an on altı re’s bârgir ve onlara isâbet eden sâir âlât-ı lâzıme-i ma‘lûmemizi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin yirmi bir bin iki yüz yirmi dört guruş on altı paraya mesfûr Habbâz Ohannes zimmî ile şerîki müvekkil-i mersûm Karabet zimmîye her birimiz bey‘ ve temlîk ve teslîm eylediğimizde onlar dahi yedlerimizden iştirâ ve temellük ve tesellüm ve kabz ve kabûl eylediklerinden sonra benim ve şerîkim hâzır-ı mersûm Ağya zimmînin ve müvekkil-i mersûm Melkon zimmînin zikr olunan fırın ve değirmeni müddet-i i‘mâlimizde cânib-i mîrîden iştirâ eylediğimiz zehâyir esmânından cânib-i mîrîye altı bin beş yüz otuz buçuk guruş ve tüccârdan iştirâ eylediğimiz zehâyir esmânından tüccâra yirmi bin guruş zimmetimizde deynimiz olup cümlemizin cânib-i mîrîye olan altı bin beş yüz [51a] otuz buçuk guruş deyn-i mezkûrumuzdan müvekkil-i mersûm Melkon zimmînin ber-vech-i muharrer bey‘ etmeyüp yedinde ibkā eylediği dört re’s bârgire isâbet eden bin üç yüz altı guruş dört para ile kezâlik cümlemizin tüccâra olan yirmi bin guruş deyn-i mezkûrumuzdan müvekkil-i mesfûr Melkon zimmînin yedinde ibkā eylediği sâlifü’z-zikr dört re’s bârgire isâbet eden dört bin guruş ki cem‘an beş bin üç yüz altı guruş dört parayı cânib-i mîrîye ve tüccâr-ı merkūmûna müvekkil-i mesfûr Melkon zimmî ceste ceste edâya ta‘ahhüd eylediğinde tüccâr-ı merkūmûn râzılar olmalarıyla ol vechile cânib-i mîrîye olan deyn-i mezkûrumuzdan ber-vech-i muharrer mesfûrâna bey‘ ve teslîm eylediğimizde ancak zikr olunan on altı re’s bârgire isâbet eden beş bin iki yüz yirmi dört guruş on altı para ve tüccâr-ı merkūmûna olan deyn-i mezkûrumuzdan kezâlik zikr olunan altı re’s bârgire isâbet eden on altı bin guruş ki cem‘an yirmi bir bin iki yüz yirmi dört guruş on altı para cânib-i mîrîye ve tüccâra benim ve şerîkim hâzır-ı mersûm Ağya zimmînin ve müvekkil-i mersûmun kendi edâya ta‘ahhüd eylediği deyn-i mezkûrundan mâ‘adâ zimmetimizde deynimiz olmağla semen-i mezkûr yirmi bir bin iki yüz yirmi dört guruş on altı parayı deyn-i mezkûrumuza mahsûben cânib-i mîrîye ve tüccâr-ı merkūmûna edâ etmek üzere ben ve şerîkim hâzır-ı mersûm Ağya ve diğer şerîkim müvekkil-i mersûm Melkon zimmîlerden her biri mesfûr Habbâz Ohannes ve şerîki müvekkil-i mersûm Karabet zimmîlere emr ve tevkîl eylediğimizde onlar dahi kabûl ve ceste ceste edâya ta‘ahhüd ettiklerinde kezâlik tüccâr-ı merkūmûn râzılar olmalarıyla mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d zikr olunan habbâz fırını ve beş horoslu habbâz değirmeni derûnlarında mevcûde gedik âlâtı olan yirmi re’s bârgir ve sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûme kemâ-fi’s-sâbık müvekkil-i mersûmun yedinde bâkī mâlı olup mâ‘adâ on altı re’s bârgir ve onlara isâbet eden sâir âlât-ı lâzıme-i ma‘lûmeden benim ve şerîkim hâzır-ı mersûm Ağya zimmînin ve müvekkil-i mersûm Melkon zimmînin kat‘â alâka ve medhalimiz kalmayup mesfûr Ohannes ve şerîki müvekkil-i mesfûr Karabet zimmîlerin iştirâken mülk-i müşterâları olmuşdur deyü mesfûr Serkiz zimmînin eylediği ikrâr u i‘tirâfını şerîki hâzır-ı mesfûr Ağya zimmî ve vekîli hâzır-ı mezbûr Mehmed Efendi ve asıl ve vekîl-i mersûm Ohannes zimmîden her biri ba‘de’t-tasdîk zikr olunan habbâz fırını ve beş horoslu bir bâb habbâz değirmeni gedik âlât-ı lâzıme-i mezkûresinden müvekkil-i mesfûr Melkon zimmînin bâkī dört re’s bârgir mesfûrun üzerinde ibkā ile ismine kayd ve mâ‘adâ on altı re’s bârgirden sekiz re’s bârgir mesfûrân Ohannes ve Karabet zimmîlerden her birinin isimlerine kayd ile yedlerine sûret i‘tâ buyrulmak bâbında her biri istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî 11 C sene 1237