İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 290 Hüküm no: 266 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî Yusuf b. Abdullah’ın boşandığı eşinden küçük çocuğu Abdullah’ı teslim aldığı Mühtediye sagīri teslîm Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Mühtedî Yusuf b. Abdullah nâm kimesne meclis-i şer‘-i münîrde zevc[e]-i mutallakası mu‘arrefetü’ş-şahs Sâre bt. Mişon nâm Yahûdiye muvâcehesinde ben hamden lillâhi te‘âlâ hidâyet-i Rabbâniye ile edyân-ı bâtıladan teberrî edüp şeref-i İslâm ile müşerref olduğumdan sonra işbu târih-i i‘lâm şehrinin üçüncü günü mersûme Sâre Yahûdiye’yi İstanbul’da Balat mahkemesinde huzûr-ı hâkimü’ş-şer‘de bâyinen tatlîk ve hukūk-ı zevciyete ve sâir hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî bâ-hüccet-i şer‘iyye ibrâ ve iskāt etmişdik lâkin mersûme Sâre Yahûdiye ile zevciyet beynimizde kāime iken firâşımdan hâsıl ve mesfûreden mütevellid ve bi-hakkı’l-hıdâne hacr ve terbiyesinde kalan bana teb‘iyyet ile Müslim olup mukaddemâ Nesim ve hâlâ Abdullah ismiyle müsemmâ hâzır bi’l-meclis tahmînen on beş aylık sagīr oğlumu ihlâk yâhud tağyîb etmesi havfımdan nâşî ancak oğlum sagīr hâzır-ı merkūmu anası mutallakam mersûmeden taleb eylediğimde [53b] ol dahi rızâsıyla sagīr-i merkūm Abdullah’ı işbu meclis-i şer‘de bana teslîm ben dahi yedinde ahz ve sagīr-i mezbûru bir Müslime murzi‘a tedârüküyle ırzâ‘ ettirmek üzere infâka ta‘ahhüd eyledim deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 27 C sene 1237