İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 291 Hüküm no: 267 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Karabet’in, Sarraf Mıgırdıç v. Minasğan’a olan borcunu ödemesi gerektiği 1.434,5 guruş hüküm Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Sarraf Mıgırdıç v. Minasğan zimmî meclis-i şer‘-i münîrde derûn-ı arzuhâlde mastûrü’l-ism Sarraf Yazıcı Kirkor v. Karabet nâm zimmî muvâcehesinde bin iki yüz otuz dört senesi şehr-i Ramazani’l-mübâreki selhi târihiyle müverrah Ermeniyyü’l-imlâ işbu yedimde olan bir kıt‘a temessük mantûkunca on bir bin dört yüz yetmiş beş guruş ve yine târih-i merkūm ile müverrah yedimde olup zâyi‘ olan diğer bir kıt‘a temessükde muharrer iki bin sekiz yüz altmış dokuz buçuk guruş ki cem‘an mersûm Yazıcı Kirkor zimmî zimmetinde cihet-i karz-ı şer‘îden on dört bin üç yüz kırk dört buçuk guruş alacak hakkım olmağla meblağ-ı mecmû‘-ı mezkûru mesfûr Yazıcı Kirkor zimmîden taleb ederim deyü eylediği da‘vâsını mesfûr Yazıcı Kirkor zimmî bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi meblağ-ı mecmû‘-ı mezkûr on dört bin üç yüz kırk dört buçuk guruşun bi’t-taleb müdde‘î-i mesfûr Mıgırdıç zimmîye edâsıyla mersûm Yazıcı Kirkor zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 23 C sene 1237