İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 295 Hüküm no: 273 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Ömer, Mehmed Ağa b. Mustafa ve Zakar v. Asvador’un, Filibos v. Kirkor’un vârisleriyle sulh oldukları Habbâz ve değirmen Ma‘rûz[-ı dâ‘î-i devlet-i aliyyeleridir ki] Uncu esnâfından olup bundan akdem hâlik olan derûn-ı arzuhâlde mastûrü’l-ism Filibos v. Kirkor nâm zimmînin verâseti zevcesi Aranik bt. Takfor nâm Nasrâniye ile sulbî kebîr oğulları Hadros ve Karabet ve Ohannes ve Avidis nâm zimmîler ve sulbiye kebîre kızları Nosayir ve Azer Nasrâniyelere ba‘de’l-inhisâr ashâb-ı arzuhâl şahısları mu‘arrefeler zevce-i mersûme Aranik ve mesfûretân Nosayir ve Azer Nasrâniyeler ile mesfûrûn Hadros ve Karabet ve Ohannes ve Avidis nâm zimmîler Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde mahmiye-i İstanbul’da Samatyakapısı hâricinde vâki‘ kethüdâ değirmeni demekle ma‘rûf ma‘lûmü’l-hudûd beş horoslu bir bâb uncu değirmeni derûnunda mevcûde beyne’l-hiref gedik tâ‘bir olunur yirmi re’s bârgir i‘tibâr olunan uncu âlât-ı lâzıme-i ma‘lûmesinin yirmi sehm i‘tibâriyle sekiz sehmine şirâen mâlik olmak üzere vâzı‘u’l-yed olan derûn-ı arzuhâlde mezkûrü’l-ism el-Hâc Hüseyin Ağa b. Ömer ve dört sehmine kezâlik mâlik olmak üzere vâzı‘u’l-yed olan Mehmed Ağa b. Mustafa ve sekiz sehmine kezâlik mâlik olmak üzere vâzı‘u’l-yed olan derûn-ı arzuhâlde mastûrü’l-ism Zakar v. Asvador nâm zimmî muvâcehelerinde zikr olunan uncu değirmeni âlât-ı lâzıme-i mezkûresinden ber-i‘tibâr-ı merkūm yedi sehm hisse-i şâyi‘ası işbu yedimizde olan bin iki yüz dört senesi şehr-i Rebî‘ülevvelinin altıncı günü târihiyle müverraha bir kıt‘a hüccet-i şer‘iyye mantûkunca mûrisimiz hâlik-i mesfûr Filibos zimmînin sağlığında ile’l-helâk yedinde mâlı ve mülk-i müşterâsı olup işbu târihden on dört sene mukaddem hâlik oldukda zikr olunan yedi sehm hissesi bize mevrûs olmuşken mezbûrân el-Hâc Hüseyin Ağa ve Mehmed Ağa ve mesfûr Zakar zimmî zikr olunan beş horoslu uncu değirmeni derûnunda mevcûde yirmi re’s bârgir i‘tibâr olunan gedik âlât-ı lâzımesinin mecmû‘unu bi-gayr-ı hakkın fuzûlî zabt etmeleriyle âlât-ı lâzıme-i mezkûreden i‘tibâr-ı mezkûr üzere yedi sehm hisse-i merkūmemizi her birimiz bi’l-verâse taleb ederiz deyü da‘vâ eylediğimizde mezbûrân el-Hâc Hüseyin Ağa ve Mehmed Ağa ve mesfûr Zakar zimmî cevâblarında âlât-ı mezkûreyi biz âhara mâliklerinden semen-i medfû‘ ve makbûza iştirâ etmemizle ber-vech-i muharrer mülk-i müşterâmız olmak üzere zabt ederiz deyü zikr olunan yedi sehm hisse-i şâyi‘ası mûrisimiz hâlik-i mesfûrun mâlı olup bize mevrûs olduğunu ba‘de’l-inkâr beynimize muslihûn tavassutuyla biz da‘vâ-yı mezkûremizden mezbûrân el-Hâc Hüseyin Ağa ve Mehmed Ağa ve mesfûr Zakar zimmî ile an inkâr altı yüz guruş üzerine bi’l-verâse ba‘de akdi’l-musâlaha ve’l-kabûl bedel-i sulh-i merkūmdan mâ‘adâ bi’l-cümle husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan ibrâ-i âmm-ı kâti‘ü’n-nizâ‘ ve râfi‘u’l-hısâm ile mezbûrân el-Hâc Hüseyin Ağa ve Mehmed Ağa ve mesfûr Zakar zimmînin zimmetlerini kabûllerini hâvî her birimiz bi’l-verâse ibrâ ve iskāt edüp ol vechile zikr olunan uncu değirmeni âlât-ı lâzıme-i merkūmesine müte‘allika mezbûrûn ile kat‘â bi’l-verâse da‘vâ ve nizâ‘ ve husûmetimiz kalmadı deyü müdde‘ûn-ı mesfûrûnun bi’t-tav‘ ve’r-rızâ ikrâr u i‘tirâflarını mezbûrân el-Hâc Hüseyin Ağa ve Mehmed Ağa ve mesfûr Zakar zimmîden her biri tasdîk ve ibrâdan müstesnâ bedel-i sulh-i merkūm altı yüz guruş zimmetlerinde deynleri olduğunu ikrâr ve edâya ta‘ahhüd eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 27 C sene 1237