İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 295 Hüküm no: 272 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acı Avanes v. Avanes’in fincancı ve tuhafiyeci gediğini Mesrob v. Serope’ye sattığı Fincancı ve Tuhâfcı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ tuhafcı ve fincancı esnâfından Acı Avanes v. Avanes nâm zimmî meclis-i şer‘-i münîrde yine esnâf-ı merkūmeden Mesrob v. Serope nâm zimmî muvâcehesinde takrîr-i kelâm edüp İstanbul’da Sultan Bâyezid-i Velî Câmi‘-i şerîfi havlusunda kolluk tahtında çeşme sırasında Kegork zimmî dükkânına muttasıl bir bâb tuhafcı ve fincancı dükkânı derûnunda mevcûde başmuhâsebe kaleminde mukayyed beyne’l-esnâf gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin mersûm Mesrob zimmîye bin yüz guruş semen-i medfû‘ ve makbûza esnâf-ı merkūme kethüdâsı ve yiğitbaşı Menteş v. Avram Yahûdi hâzırlar iken bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i ma‘lûme mersûm Mesrob zimmînin mülk-i müşterâsı olup benim kat‘â alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Acı Avanes zimmî üzerine kayd-ı atîki ref‘ ve terkīn ve yedinde olan sûreti battâlda hıfz-birle mersûm Mesrob zimmî ismine kayd ve yedine bir kıt‘a sûret i‘tâsı bâbında istid‘â-yı inâyet etmeğin istid‘âsı üzere gedik-i mezkûrun mesfûr Acı Avanes zimmî üzerinde olan kaydı ref‘ ve müşteri-i mersûm Mesrob zimmî ismine kayd ve yedine müceddeden sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 3 Receb sene 1237