Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 305 Hüküm no: 326 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hasan b. Resul’ün Hacı Mehmed b. Mustafa’da alacağı olması Mahrûse-i Galata’ya tâbi‘ kasaba-i Tophâne’de Cihangir mahallesinde sâkin el-Hâc Hasan b. Resul nâm kimesne meclis-i şer‘-i şerîfde kasaba-i mezbûrede Fındıklı mahallesinde sâkin el-Hâc Mehmed b. Mustafa nâm kimesne üzerine da‘vâ ve takrîr-i kelâm edip mezbûr el-Hâc Mehmed’in gāib ani’l-meclis kız karındaşı oğlu (…) b. Muharrem nâm kimesne ile ale’l-iştirâki’s-seviy işbu hâzır bi’l-meclis el-Hâc Yusuf b. Abdullah nâm kimesneye üç yüz sekiz guruş deynleri olup meblağ-ı mezbûr üç yüz sekiz guruşu ben mezbûrânın (…) [emriyle] kefîl oldukdan sonra meblağ-ı mezbûr üç yüz sekiz guruşu kendi malımdan dâyinleri olan merkūm (…) [el-Hâc Yusuf’a] edâ ve teslîm ol dahi bi’t-tamâm benden ahz u istîfâ etmekle hâlâ mezbûr el-Hâc Mehmed’e suâl olunup mezbûrdan kendi hissesine isâbet eden yüz doksan guruşun bana alıverilmesi matlûbumdur dedikde gıbbe’s-suâl mezbûr el-Hâc Mehmed cevâbında kaziyye minvâl-i muharrer üzre olup müdde‘î-i mezbûr kendi (…) [emriyle] meblağ-ı mezbûr üç yüz sekiz guruşa kefîl olup bi hasebi’l-kefâle meblağ-ı mezbûru dâyin-i mezbûr (…) [el-Hâc Yusuf’a] edâ eylediğini ikrâr lâkin ben gāib-i mezbûr el-Hâc Ahmed ile şerîkler olup mahrûse-i Mısr-ı Kahire’den (…) mecmû‘ altı yüz yirmi sekiz guruş kıymetli yedi irdeb pirinç ve dört irdeb mercimek ve her faslası altı (…) kantar on iki fasla ketenimizi müdde‘î-i mezbûr el-Hâc Hasan’a irsâl ve îsâl, ol dahi ba‘de’l-kabz (…) bey‘ ve semenlerinden merkūme el-Hâc Yusuf deynimiz olan üç yüz sekiz guruş edâ etmişdir deyû (…) [red ile] mukābele edicek gıbbe’l-istintâk ve’l-inkâr, mezbûr el-Hâc Mehmed’den def‘-i mezbûrlarına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka mezbûr el-Hâc Mehmed’in mecmû‘u altı yüz (…) [yirmi] sekiz guruş kıymetli yedi irdeb pirinç ve dörd irdeb mercimek ve on iki fasla ketenini ber vech-i muharrer ahz u kabz ve âhara bey‘ ve semenlerinden deyn-i mezkûru edâ etmeyip ve ol vechile merkūm el-Hâc Mehmed zimmeti mütâlebeden beri olmadığına müdde‘î-i mezbûr el-Hâc Hasan’a yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince meblağ-ı mezbûr yüz doksan guruş müdde‘î-i mezbûr el-Hâc Hasan’a edâ ve teslîme mezbûr el-Hâc Mehmed’e tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a tis‘în ve elf. Şuhûdü’l-hâl: Mehmed Beşe b. Mehmed, Mehmed b. Mehmed, el-Hâc Mustafa b. Tevekkül, İbrahim Çelebi b. Ahmed, Mehmed Beşe b. İbrahim.