İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 297 Hüküm no: 275 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İdris Beşe b. Hüseyin ile Mehmed b. Seyyid Ali’nin birbirlerinin zimmetlerini ibrâ ettikleri 340 guruş meccânen ibrâ Ma‘rûz[-ı dâ‘î-i devlet-i aliyyeleridir ki] Derûn-ı arzuhâl hâmişinde muharrer bir kıt‘a i‘lâm-ı şer‘îde ismi mezkûr İdris Beşe b. Hüseyin meclis-i şer‘-i münîrde kezâlik i‘lâm-ı merkūmda ismi mezkûr sâhib-i arzuhâl es-Seyyid Mehmed b. es-Seyyid Ali nâm kimesne muvâcehesinde sene-i sâbıkā Cemâziyelâhiresinin yirmi birinci günü târihiyle müverrah bâlâda mezkûr i‘lâm-ı şer‘î mantûkunca mezbûr es-Seyyid Mehmed zimmetinde bedel-i sulh-i sahîh-i şer‘îden mahkûmun-bih alacak hakkım olan bin guruşun altmış guruşunu bundan akdem mezbûr es-Seyyid Mehmed yedinden ahz ü kabz etmemle bâkīsi olan dokuz yüz kırk guruşun altı yüz guruşunu dahi mezbûr es-Seyyid Mehmed işbu meclis-i şer‘de nakden bana edâ ve def‘ ve teslîm ben dahi yedinden ahz ü kabz etmemle mâ‘adâsı olan üç yüz kırk guruş mutâlebesinden rızâmla sulhen meccânen fâriğ olmamla meblağ-ı bâkī-i merkūm üç yüz kırk guruşa ve işbu târih-i i‘lâma gelince husûs-ı şirkete ve bi’l-cümle ahz ü i‘tâ ve mu‘âmelât-ı şettâya ve her birimiz âharın yed ve zimmetinde kat‘â hakkımız kalmamak manasına sâir cemî‘ hukūk-ı şer‘iyyeye müte‘allika mutlakan âmme-i de‘âvî ve mutâlebât ve kâffe-i eymân ve muhâsemâtdan şürût-ı müfsideden ârî ibrâ-i âmm-ı sahîh-i şer‘î ile her birimiz âharın zimmetini kabûlü hâvî ibrâ ve iskāt ve bu vechile külliyen kat‘-ı nizâ‘ ve ref‘-i husûmet eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 3 Receb sene 1237