İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 302 Hüküm no: 278 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi tablakârı Bedros’un oğlu Artin’in Müslüman olduğu Sinn-i temyîzini tecâvüz eden sagīr-i akıli mümeyyizin İslâm’ı şer‘an mu‘teber olmağın anasının kelâmına iltifât olmamağla Ma‘rûz-ı dâ‘î[-i devlet-i aliyyeleridir ki] İstanbul’da Tercümân Yunus Mahallesi mütemekkinlerinden Ekmekçi tablakârı Bedros nâm zimmînin oğlu ve dokuz yaşında idüğü mütehakkık olup te‘akkul-i dîn eden derûn-ı arzuhâlde mezkûr Mühtedî Abdullah nâm sagīr-i muhayyer meclis-i şer‘-i şerîf-i enverde sâhibey-i arzuhâlden anası şahsı mu‘arrefe Maryem bt. Artin nâm Nasrâniye hâzır olduğu hâlde ba‘de’l-istintak işbu târih-i i‘lâmdan üç gün mukaddem bi’t-tav‘ ve’r-rızâ hidâyet-i Rabbâniye ile dîn-i İslâmı hak bilip cemî‘ edyân-ı bâtıladan teberrî ve ityân-ı kelimeteyn-i şehâdeteyn edüp şeref-i İslâmla müşerref olup mukaddemâ ismi Artin iken talebiyle Abdullah tesmiye olunduğu kezâlik bi’t-tav‘ ve’r-rızâ takrîr ve anası hâzır-ı mersûme dahi sagīr-i merkūmun ber-vech-i meşrûh dokuz yaşında olup İslâmı kabûl eylediğini ba‘de’t-tasdîk oğlum mezbûr sagīr olmağla ba‘zı kimesnelerin iğfâliyle İslâmı kabûl etmişdir hâşâ ben i‘tibâr etmem dedikde tekrar sagīr-i merkūm meclis-i merkūmda bi’l-cümle edyân-ı bâtıladan teberrî ile ityân-ı kelimeteyn-i şehâdeteyn etmeğin bu vechile dokuz yaşında olup sinn-i temyîzi tecâvüz eden sagīr-i akıli mümeyyizin İslâmı şer‘an mu‘teber olmağın mûcebiyle anası hâzır-ı mersûmenin da‘vâ-yı bâtıla-i mezbûresine şer‘an i‘tibâr ve iltifât olunmayup bî-vech-i şer‘î mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî-gurre-i Receb sene 1237