İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 300 Hüküm no: 277 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sığır kasapları ile debbâğ esnâfının deri fiyatları hususundan anlaştıkları Sığır kasablarıyla debbâğ esnâfı deri fiyatından rûz-ı hızır duhûlünde müceddeden pazarlık etmeğe ta‘ahhüd Ma‘rûz-ı dâ‘î [-i devlet-i aliyyeleridir ki] Ashâb-ı arzuhâl Âsitâne-i aliyye ve bilâd-ı selâsede vâki‘ sığır kasabları kethüdâsı el-Hâc İbrahim Ağa ve esnâfından Derviş Mehmed Ağa ve İsmail Ağa ve es-Seyyid el-Hâc Mustafa Ağa ve Osman Ağa ve Mehmed Ağa ve diğer Mehmed Ağa ve es-Seyyid Ahmed ve Mehmed Ârif Ağa ve Hasan Ağa nâm Müslimîn ile Yahûdi ustalarından Mosi ve Neftali ve İlya ve diğer Mosi ve Mayer nâm Yahûdiler Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde mezkûr kezâlik Âsitâne-i aliyye ve bilâd-ı selâsede kâin beş ocak tâ‘bir olunur debbâğ esnâfından Yedikule debbâğları Kethüdâsı Hüseyin Ağa ve Yiğitbaşı es-Seyyid Ahmed Ağa ve esnâfından el-Hâc Mustafa Ağa ve es-Seyyid Mustafa Efendi ve es-Seyyid Abdi Ağa ve medîne-i Eyüb debbâğları kethüdâsı Süleyman Ağa ve Yiğitbaşı diğer Süleyman Ağa ve esnâfından es-Seyyid Mehmed Efendi ve Hasan ve İbrahim Ağa ve Tophâne debbâğları kethüdâsı İsmail Ağa ve Yiğitbaşı es-Seyyid Ahmed Ağa ve esnâfından Bilal Ağa ve Üsküdar debbâğlarından el-Hâc Mahmud Ağa ve es-Seyyid Muhammed Şâkir Ağa ve Mustafa Ağa nâm kimesneler bi’l-muvâcehe terâfû‘larında Rumeli ve Anadolu câniblerinden Âsitâne-i aliyyede Yedikule hâricinde Tokad nâm mahalle vürûd eden bakar sürekleri şürût-ı nizâm mûcebince merbût olan selhhânelerimize tevzî‘-birle zebh olunup hâsıl olan derilerini beher sene rûz-ı hızır duhülünde kat‘ olunan fiyat üzere debbâğ esnâfına bey‘ edegeldiğimize binâen bin iki yüz otuz iki senesi Şa‘bâni’l-mu‘azzamının on beşinci günü târihiyle müverrah ve bâlâsı tuğra-yı garrâ-yı hazret-i cihânbâni ile müzeyyen tarafeynin yedlerimizde olan iki kıt‘a fermân-ı âlîşânda tafsîl ve beyân kılındığı üzere ol târihde beynimiz tevfîk ve ıslâh olundukta ber-vech-i muharrer selhhânelerimizde zebh eylediğimiz hayvânâtdan hâsıl olan derilerin bir adedini taşra memleket tüccârına ve ecânibden kimesneye bey‘ etmeyüp ber-mûceb-i evâmir-i aliyye şürût-ı nizâm-ı mer‘iyyemiz üzere debbâğ esnâfına verdiğimiz derilerden debbâğ esnâfının fiyat-ı maktû‘a-i mîrîye ile cânib-i mîrîye verdikleri kavasla mikdârını biz dahi debbâğ esnâfına maktû‘a-i mîrî üzere ve mâ‘adâsı olup âhara bey‘ eyledikleri kavasla i‘mâl olunan koşulu[r] öküz derisini on sekizer guruşa ve sağılır inek derilerin üç adedi iki aded i‘tibâriyle yine on sekizer guruşa olmak üzere beynimizde hesâblaşıp umûr-ı mühimme-i lâzımesi içün kavasla i‘mâline salâhiyeti olmayan buzağı ve dana ve camus ve toska makūlelerinin derilerini dahi râyic-i vakt üzere mübâya‘a edüp ziyâde mutâlebesi ve noksan teklîfi ile tarafeynden her birimiz âhara te‘addî ve rencîde etmemek üzere [56a] bi’t-terâzî mu‘âhede-i tam edüp târih-i mezkûrdan sene-i sâbıkā rûz-ı hızırına gelince her sene duhûl eden rûz-ı hızırda beynimizde tecdîd-i mu‘âhede ve i‘lâm-ı şer‘îye rabt ederek fiyat-ı mezkûreye halel vermeyerek bey‘ u şirâ olunur iken sene-i sâbıkā rûz-i hızırında tecdîd-i mu‘âhede olunmadığı ser-rişte-i ittihâz edüp bir ay müddetden berü ve zebh eylediğimiz hayvânâtın hâsıl olan derilerini debbâğ esnâfı merkūmûn almayıp selhhânelerimizde terk eylediklerinden mâ‘adâ işbu târihden bir ay mukaddeme gelince aldıkları derilerin fiyatında dahi noksan teklîfi ile zarâr ve hasarâtımızı mûceb olur hâlâta tasaddî etmeleriyle ber-vech-i muharrer tasaddîleri men‘ olunup fiyat-ı mezkûre ile yedlerimizde olan derileri ahz eylemeleri matlûbumuzdur dediklerinde debbâğ esnâfı mezbûrûn dahi sene-i sâbıkā rûz-ı hızırında fiyat-ı mezkûremiz kat‘ ve sâbıkı vechile mu‘âhede olunmayup lâkin bizim dahi zarâr ve hasarâtımız vardır deyü fiyat-ı mezkûre üzere iştirâdan imtinâ‘ ile beynlerinde münaza‘ât-ı kesîre vukū‘undan sonra şifâhen sâdır olan fermân-ı âlîlerine imtisâlen muslihûn tavassutuyla beynleri ıslâh eylediklerinde sene-i sâbıkā rûz-ı hızırından işbu târih-i i‘lâma gelince debbâğ esnâfı aldıkları derileri fiyat-ı sâbıkā-yı mezkûre ile sığır kasabları mezbûrûn ile hesâblaşıp ve sığır kasablarının yedlerinde mevcûd olmadıkları derilerden ancak iki yüz aded derileri yine fiyat-ı sâbıkā-yı mezbûre ile ahz etmek ve umûr-ı mühimme içün kavasla i‘mâl eyledikleri derileri yine fiyat-ı maktû‘a aded-i mîrîye üzere mübâya‘a edüp fîmâ ba‘d mâ‘adâ âhara bey‘ içün i‘mâl eyledikleri kavasla olacak derilerden işbu sene-i mübârekede duhûl edecek rûz-ı hızıra değin kavasla olacak koşulur öküz derisinin fiyat-ı sâbıkāsından bi’t-terâzî üç guruş tenzîl ile her bir adedini on beş guruşa ve sağılır inek derilerinin üç adedi iki aded i‘tibâriyle kezâlik on beş guruşa ve kavasla i‘mâline salâhiyeti olmayan buzağı ve dana ve camus ve toska makūlelerinin derilerini râyic-i vakt üzere hesâblaşın ancak târih-i i‘lâmdan rûz-ı hızıra varınca fiyat-ı mezkûre ile ahz u i‘tâya târih-i i‘lâmdan mukaddem aldıkları ve gerek sâlifü’z-zikr iki yüz aded deriler esmânında noksan teklîfi ve kassabların alacakları olan mebâliği edâ ve teslîmde cevr ve ezâ etmemek ve rûz-ı hızır duhûlünde müceddeden yine pazarlık etmek üzere bi’l-muvâcehe tarafeyn bi’t-terâzî ta‘ahhüd-i tam eylediklerinde ol vechile kat‘-ı nizâ‘ ile tarafeynin tasâdduk ve ittifâkları tescîl ve İstanbul Mahkemesi’nden huzûr [-ı âlîlerine i‘lâm olundu.] Fî 11 C sene 1237