İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 303 Hüküm no: 280 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivici esnafının, Karabet v. Agob, Mardiros v. Ağyazar ve Mardiros v. Haçador’dan şikâyetlerini erteledikleri Şikâyetlerini tehîr Ma‘rûz[-ı dâ‘î-i devlet-i aliyyeleridir ki] Âsitâne-i aliyye -sânehullâhu te‘âlâ ani’l-âfât ve’l-beliyye-de vâki‘ enserci esnâfının kâhyaları Azerya v. Manok ve Yiğitbaşı Mardiros ve Kabz-ı mâl Simyon ile esnâf-ı merkūme ustalarından Marat ve Arakil ve Melkon ve Gabril ve Yoseb ve Karabet ve Parsam ve Kukas ve Tatos ve Asador ve diğer Karabet ve Kiragos ve Begos ve Kirkor ve diğer Asador ve sâir mazbûtü’l-esâmî zimmîlerden her biri meclis-i şer‘-i hatîrde esnâf-ı mezkûreden mahmiye-i mezbûrede Unkapanı’nda mütemekkin Karabet v. Agob ve Küçükmustafapaşa’da köşe ustası Mardiros v. Ağyazar ve Uzun ve diğer Mardiros v. Haçador nâm zimmîler muvâcehelerinde mersûmûn Karabet ve Mardiros ve diğer Uzun Mardiros zimmîler esnâfımız ustalarından olup lâkin kendi hallerinde ırzları ve kar [u] kisbleriyle meşgūl olmadıklarından mâ‘adâ dâimâ esnâfımızı rahnedâr etmek sevdâsında ve ol vechile şürût-ı nizâmımızın ihtilâline bâ‘is olacakları meczûmumuz oldukda mersûmunu ahz ve defa‘âtle kendilere tenbîh olundukta kat‘â ısgā etmediklerinden bundan akdem esnâf-ı merkūmeden hurûclarını iltimâs ile cümlemiz kendülerden teşekkî etmek üzere iken mersûmûn fîmâ ba‘d ef‘âl-i sâbıkālarını terk ve umûr-ı esnâfa kat‘â müdâhale etmeyerek kendi dükkânlarında san‘atlarını i‘mâl ve ırzıyla mukayyed olup kisbleriyle meşgūl olmak üzere her biri ta‘ahhüd-i kavî ile mu‘ahhed etmeleriyle ba‘de’l-yevm şürût-ı nizâmımızın ve müte‘ahhedlerinin hilâfı hareketleri zuhûr eder ise vaz‘-ı kürek ile tedîb olunmalarıyla râzılar oldukda biz dahi kabûl ve ber-vech-i muharrer şikâyetlerimizi tehîr eyledik dediklerinde mersûmûn dahi ber-vech-i muharrer ta‘ahhüd ve hilâfına hareket ederler ise vaz‘-ı kürek ile tedîblerine râzılar olduklarını bi’l-muvâcehe tasdîk eylediklerini İstanbul Mahkemesi’nden huzûr [-ı âlîlerine i‘lâm olundu.] Fî 2 Receb sene 1237