İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 304 Hüküm no: 281 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim İzzet Beyefendi ile Mehmed Said b. Ali’nin kira davasında sulh oldukları Bir bâb yektâ hamamının beher sene tecdîd-i akd-i icârdan 400 guruş üzerine sulh Ma‘rûz-ı dâ‘î [-i devlet-i aliyyeleridir ki] Sâhib-i arzuhâl el-Hâc Mehmed Said Efendi b. el-Hâc Ali nâm kimesne bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan fazîletlü Hatîbzâde es-Seyyid Mehmed Derviş Efendi dâ‘îleri tarafından me’zûnen mürsel kâtib es-Seyyid İbrahim Efendi hâzır olduğu hâlde meclis-i şer‘-i münîrde Dârü’s-sa‘âdeti’ş-şerîfe ağası hazretlerinin nezâretlerinde âsûde evkāfdan merhûme Hümâşah Sultan -tâbe serâhâ- Vakfı’nın meşrûtiyet üzere mütevellîsi müderrisîn-i kiramdan [kiram-ı] zevi’l-ihtirâmdan derûn-ı arzuhâlde ismi mezkûr Abdülkerim İzzet Beyefendi b. el-merhûm Derviş Mehmed Esad Beyefendi muvâcehesinde vakf-ı müşârun-ileyhâ müstegallâtından mahmiye-i İstanbul’da merhûm Sultan Bâyezid-i Velî Han aleyhi’r-rahmetü ve’l-gufrân Câmi‘-i şerîfi kurbünde vâki‘ Vezneciler hamamı demekle arîf bir bâb Yektâ hamamın bin iki yüz yirmi yedi senesi şehr-i Recebi’l-ferdi gurresinde işbu târih-i i‘lâm şehri gurresine gelince on sene müddetde beher sene tecdîd-i akd-i îcâr ile mütevellî tarafından yedime cedîd temessük i‘tâ olunarak icâre-i vâhide ile ben müsteciri olup müddet-i mezkûreden mütevellî-i mûmâ-ileyhin pederi merhûm-ı mûmâ-ileyh Derviş Mehmed Esad Beyefendi’nin beş sene zamân-ı tevliyetinde ve gerek ba‘dehû mütevellî olan oğlu mûmâ-ileyhin beş sene zamânında ücret-i ma‘lûmesini beher şehr tamamen edâ etmişken ücret-i merkūmeden mâ‘adâ beher şehr senede tecdîd-i temessük olundukta harc-ı temessük nâmıyla mûmâ-ileyh Abdülkerim İzzet Beyefendi’ye mâlımdan rüşvet tarîkiyle kendi nefsi içün yüz altmış guruşdan cem‘an on sene müddetde bin altı yüz guruş def‘ ve teslîm ol dahi yedimden ahz ü kabz ve istihlâk etmekle ol vechile müddet-i mezkûreden medfû‘um olan meblağ-ı mecmû‘-ı merkūm bin altı yüz guruşu mûmâ-ileyh Abdülkerim İzzet Beyefendi’den istirdâd ederim deyü tasaddî eylediğim da‘vâmdan bâ-vesâtet-i muslihîn mûmâ-ileyh Abdülkerim İzzet Beyefendi ile dört yüz guruş bedel-i makbûz üzerine ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan şürût-ı müfsideden ârî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile tarafeynden her birimiz âharın zimmetini kabûlü hâvî ibrâ ve iskāt ve bu vechile külliyen kat‘-ı nizâ‘ ve ref‘-i husûmet eyledik deyü ikrâr ve tasdîkleri tescîl ve İstanbul Mahkemesi’nden huzûr [-ı âlîlerine i‘lâm olundu.] Fî 7 B sene 1237