İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 313 Hüküm no: 290 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikoli v. Yani’nin, Mıgırdıç v. Karabet aleyhine açtığı davanın reddedildiği Vekâleten tereke-i mîrâsdan 3.000 guruş da‘vâsı hasm-ı şer‘î olmamağla mu‘ârazadan men‘ olundu Ma‘rûz[-ı dâ‘î-i devlet-i aliyyeleridir ki] İstanbul’da Kuşakçı hanında mütemekkin derûn-ı arzuhâlde mastûrü’l-ism Sarraf Yani v. Nedeko zimmînin oğlu ve tarafından husûs-ı âtîde vekîl olduğu Mihal v. Sava ve Dimitri v. Yorgi nâm zimmîler şehâdetleriyle ber-nehc-i şer‘î sâbit olan Nikoli zimmî meclis-i şer‘-i münîrde İstanbul’da Lanka kurbünde Kâtib Kasım Mahallesi mütemekkinlerinden olup eyâlet-i Bosna’da vâki‘ Travnik nâm-ı diğer Bosna Brodi kasabasında mütemekkin iken düyûnu terekesinden ezyed olduğu hâlde bundan akdem hâlik olan İbrişimci Anabyos v. Kigork zimmînin verâseti zevcesi Derohi bt. Ağya Nasrâniye ile sulbî kebîr oğlu Agob ve sulbiye sagīre kızı Serpohi’ye ba‘de’l-inhisâr sâhibey arzuhâl Mıgırdıç v. Karabet nâm zimmî muvâcehesinde işbu yedimde olan bin iki yüz otuz dört senesi Zilka‘deti’ş-şerîfesinin on beşinci günü ile müverrah Ermeniyyü’l-imlâ bir kıt‘a temessük mantûkunca babam müvekkil-i mesfûr Sarraf Yani zimmînin hâlik-i mersûm İbrişimci Anabyos zimmî zimmetinde cihet-i karz-ı şer‘îden üç bin guruş alacak hakkı olup hâlik-i mesfûr Anabyos zimmî bin iki yüz otuz beş senesi şehr-i Recebi’l-ferdi hilâlinde sağlığında kasaba-i mezbûreden mesfûr Mıgırdıç zimmîye üç bin guruş irsâl ve meblağ-ı mezbûr üç bin guruş ile babam müvekkil-i mesfûra olan ol mikdâr guruş zimmetini edâ etmek üzere mesfûr Mıgırdıç zimmîye emr etmiş olduğu babam müvekkil-i mersûmun mesmû‘u oldukda meblağ-ı mezbûru mersûm Mıgırdıç zimmîden hâlik-i mersûmun sağlığında taleb edüp ol dahi cevâbında ben umûruma sarf etdim sonra veririm deyü tehîr ve babam müvekkil-i mesfûra kable’l-edâ mesfûr İbrişimci Anabyos dahi hâlik olmağla mücerred babam müvekkil-i mesfûra edâ etmek üzere memûr olduğu meblağ-ı mezbûr üç bin guruşu hâlik-i mesfûrun sağlığında edâ etmeyüp umûruma sarf eyledim dediğine binâen mesfûr Mıgırdıç zimmîden bi-tarîkı’d-damân bi’l-vekâle taleb ederim deyü takrîr-i meşrûhu üzere eylediği da‘vâsında mersûm Mıgırdıç zimmî hasm-ı şer‘î olmayup meblağ-ı mezbûru yine tereke-i hâlik-i mersûmdan da‘vâ etmek iktizâ eylediği müdde‘î-i vekîl-i mersûm Nikoli zimmîye tefhîm ve da‘vâ-yı mezkûresiyle mersûm Mıgırdıç zimmîye bî-vech-i mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 17 Receb sene 1237