İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 312 Hüküm no: 289 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Meldon’un, oda gediğini Abdullah Efendi b. Abdullah’a sattığı 2.000 guruşa oda gediği Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ hâzırcı tâ‘bir olunur çukacı esnâfından Bedros v. Meldon nâm zimmî meclis-i şer‘-i enverde Enderûn-ı Hümâyûndan muhrec bâ‘isü’l-i‘lâm Abdullah Efendi b. Abdullah nâm kimesne mahzarında İstanbul’da çarşû-yı kebîrde Duâmeydanı kurbünde Alemşah sokağında vâki‘ Hüdaverdi Artin dükkânları ile mahdûd iki kepenkli bir bâb hâzırcı tâ‘bir olunur çukacı dükkânı derûnunda mevcûde başmuhâsebede mukayyed beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin esnâf-ı merkūmenin ustabaşıları Yayla oğlu Kirkor ve Kabamacı oğlu Anberson ve Toma zimmîler hâzırlar iken mezbûr Abdullah Efendi’ye iki bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûre mezbûr Abdullah Efendi’nin mülk-i müşterâsı olup benim kat‘an alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Bedros zimmî üzerine olan kayd-ı atîki ref‘ ve terkīn ve yedinde olan sûreti battâlda hıfz-birle mezbûr Abdullah Efendi ismine kayd ve yedine nizâmları şürûtu üzere müceddeden bir kıt‘a sûret i‘tâsı bâbında istid‘â-yı inâyet etmeğin istid‘âsı üzere gedik-i mezkûrun mesfûr Bedros zimmî üzerinde olan kaydı ref‘ ve müşteri-i mezbûr Abdullah Efendi ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 16 B sene [12]37