İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 317 Hüküm no: 294 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miraç gecesinde cami ve mescitlerin aydınlatılması Şeb-i Mi‘râcü’n-Nebî aleyhi’s-selâm İstanbul Kādısı fazîletlü efendi İşbu i‘lâmınız rikāb-ı hümâyûn-ı hazret-i Hilâfet-penâhîye arz ile manzûr-ı hümâyûn-ı cenâb-ı padişâhî olmağla mûcebince leyle-i merkūmede îkād-ı kanâdil olunması husûsunda iktizâ edenlere tenbîhe mübâderet eyleyesin deyü buyruldu. Dergâh-ı cihân-mutâ‘ ve bârgâh-ı sipihr-irtifâ‘a ma‘rûz-ı abd-i dâ‘i-i ademi’l-istitâ‘alarıdır ki İşbu sâl-ı meymenet-iştimâl Recebi’l-ferdi gurre-i garrâsı hâlâ bi’r-rü’ye sâbite olmayup mâh-ı Cumâde’s-sânîye hasbe’r-rü’ye selâsin ile itmâm ve şehr-i mübârek Receb-i şerîf yevm-i ehad ibtidâ-yı i‘dâd-ı eyyâm olduğu mazbût olmağla işbu yirmi yedinci Cuma gecesi mazhar-ı esrar-ı isrâ-i aliyye ve alâ-âlihî efdâlü’s-salât ve enmâhâ efendimiz hazretlerinin hemkader-i leyletü’l-kadr olan şeb-i Mi‘râc-ı mûcebü’l-ibtihâcları olduğuna binâen âdet-i hasene-i Devlet-i aliyye ve kā‘ide-i müstahsene-i saltanat-ı seniyye üzere minârât-ı cevâmi‘ ve mesâcid îkād-ı kanâdil-i nûr-efşân ile tenvîr ve ol leyle-i mübârekeye bu vechile tebcîl ve tevkīr olunmağla bi’l-cümle kulûb-i müminîn safa-rehin ve meserret-karîn olmaları içün selâtîn-i âlîşân -nevvarallâhu Te‘âlâ merâkidehum bi-envâri’l-Gufrân- hazerâtı cevâmi‘-i şerîfeleri kayyımlarına tenbîh olunmak bâbında fermân-ı âlî sudûru iktizâ eylediği İstanbul Mahkemesi’nden dergâh-ı felek-fersâ ve bârgâh-ı sipihr-i‘tilâları türâbına i‘lâm olundu ol bâbda emr ve fermân hazret-i men lehü’l-emrindir. Fi’l-yevmi’s-sânî ve’l-ışrîn min-şehri Recebi’l-ferd li-sene seb‘a ve selâsin ve mi’eteyn ve elf