İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 315 Hüküm no: 293 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vezîriazâm Şehîd Mehmed Paşa ve İsmihan Sultan vakıflarının muhasebesinin mütevellî Yusuf Bey, evkaf müfettişi Mehmed Said Efendi ve tezkire-i evvel Abdülhamid Beyefendi ile birlikte rüyet edileceği Mukata‘ât-ı vakfiyenin vazâifi ve mesârifini rü’yet Ma‘rûz -ı dâ‘i [-i devlet-i aliyyeleridir ki] Mübârek rikāb-ı müstetâb-ı Hazret-i cihânbâniye takdîm olunan işbu arzuhâl derkenârda mezkûr nezâret-i hazret-i Sadâret-penâhîde âsûde evkāfdan İstanbul ve medîne-i hazret-i Ebâ Eyyüb-i Ensârî -radiya anhu Rabbihi’l-Bârî- ve Galata ve vilâyet-i Anadolu ve Rumeli’de vâki‘ İbrahim Hanzâde demekle arîf Vezîriazâm-ı esbak merhûm Şehîd Mehmed Paşa ve merhûme İsmihan Sultan -tâbe serâhumâ-nın cevâmi‘-i şerîfe ve türbe-i latîfe ve medâris ve imâret-i âmire ve hayrât-ı sâireleri evkāfının meşrûtiyet üzere mütevellîsi aslah ve ekber ve erşed evlâd-ı vâkıfdan sâhib-i arzuhâl Yusuf Bey b. Mehmed Esad Bey bi’l-ma‘iyye rü’yete memûr nezâret-i hazret-i müşârun-ileyhde âsûde evkāf müfettişi müderrisîn-i kirâm-ı zevi’l-ihtirâmdan fazîletlü Mehmed Said Efendi dâ‘îleri hâzır olduğu hâlde sâbıkā tezkire-i evvel vekîli olan hâcegân-ı dîvân-ı mu‘allâ ve erkândan derûn-ı arzuhâlde ismi mezkûr Abdülhamid Beyefendi b. İbrahim Münib muvâcehesinde hâlâ tezkire-i evvel olup vakf-ı müşârun-ileyhimânın edâsına nâzır olan Salih Efendi dâ‘îleri hâzır olduğu hâlde tezkire-i evvel-i esbak ve sâbıkā Tersâne-i âmire emîni ricâl-i devlet-i aliyyeden Sa‘âdetlü diğer Salih Efendi dâ‘îleri mukaddemâ tezkire-i evvel iken bâ-fermân-ı âlî Yanya cânibine memûren âzim olup yerine mûmâ-ileyh Abdülhamid Bey [59b] tezkire-i evvel vekîli ta‘yîn buyruldukda bin iki yüz otuz beş senesi Zilhicceti’ş-şerîfesi gurresinden otuz altı senesi şehr-i Ramazani’l-mübâreki gāyetine değin dokuz ay müddetde mukata‘ât-ı vakf-ı müşârun-ileyhimânın bedel-i iltizâmâtından nakden ve gerek hatmimle mahtûm iltizâm temessükâtı ve gerek Cığalazâde Vakfı emvâlinden vakf-ı müşârun-ileyhimâ içün hasbe’l-iktizâ istidâne olunan on bin guruş ki cem‘an mûmâ-ileyh Abdülhamid Beyefendi’nin makbûzâtı doksan dokuz bin dört yüz otuz üç guruşa bâliğ olup vakf-ı müşârun-ileyhimânın hâmiş-i arzuhâlimde muharrer ilmühaber kāimesi derkenârında mezkûr şürûtu mûcebince beher üç ayda bir def‘a mûmâ-ileyh Abdülhamid Bey ile rü’yet eylediğimiz sahh-ı âlî ile musahhah üç kıt‘a defter nâtık olduğu üzere meblağ-ı mecmû‘-ı mezkûrdan elli altı bin yedi yüz yirmi yedi guruşu mesârif-i lâzıme-i vakfa ve vezâyif-i mürtezikaya sarf olunup ve otuz altı senesi Şevvâlinde mûmâ[-ileyh] diğer Salih Efendi dâ‘îlerinin yerine hâlâ Reisülküttâb Sa‘âdetlü Mehmed Sâdık Efendi dâ‘îleri tezkire-i evvel nasb buyrulup mûmâ-ileyh Abdülhamid Beyefendi vekâletden munfasıl olduklarında mukâta‘ât-ı vakf-ı müşârun-ileyhimâ bedel-i iltizâmâtından Bergos ve Hafsa mukāta‘alarının bir taksîti olan sekiz bin guruş ve Selânik’de vâki‘ bâzârgâh mukāta‘asının kezâlik bir taksîti olan on iki bin guruş ve Haleb’de vâki‘ mukāta‘atın iki taksîtleri olan dokuz bin iki yüz altmış dokuz guruş ve Rasvat ve Minkalebe mukāta‘alarının bir taksîti olan dört bin iki yüz elli guruş ve Ahyolu’da vâki‘ Akyazılı mukāta‘asının iki taksîti olan altı bin guruşun mültezimeyn taraflarından verilen beş kıt‘a deyn temessükleri ile nakden üç bin iki yüz yirmi buçuk guruş on parayı mûmâ-ileyh Mehmed Sâdık Efendi dâ‘îlerine def‘ ve teslîm etmiş oldukları lede’t-tahkīk bi’t-tevliye ma‘lûm ve meczûmum olup ol vechile müddet-i mezbûrede mâl-ı vâkıf-ı müşârun-ileyhimâdan mûmâ-ileyh Abdülhamid Beyefendi’nin yed ve zimmetinde bir akçe ve bir habbe zuhûr etmeyüp lâkin beher sene vakf-ı müşârun-ileyhimânın mukāta‘atı âhara ilzâm olundukta mukāta‘at-ı mezkûrenin cânib-i vakfa âid olan bedel-i iltizâmatından mâ‘adâ harc-ı bâb nâmıyla herbirinden mikdârı ma‘lûm olarak cem‘an iki bin yedi yüz guruş ahz olunup hademe-i vakfa taksîm olunmak mu‘tâd iken mûmâ-ileyh Abdülhamid Beyefendi harc-ı bâb-ı mezkûru kendi nefsi içün kabz etmekle hademe-i vakf içün meblağ-ı mezbûru bana vermek üzere mûmâ-ileyhe tenbîh olunmak bi’t-tevliye matlûbumdur deyü tasaddî eylediğim da‘vâmda mültezimeyn taraflarından vekâletim olmadıkça şer‘an husûmet tahakkuk etmeyüp ol vechile husûs-ı mezkûr ile suâl dahi tevcîh etmediği bana ba‘de’t-tefhîm mûmâ-ileyh Abdülhamid Beyefendi müddet-i mezkûrede zikr olunan mukāta‘at harc-ı bâblarından zikr olunan Selânik’de vâki‘ bâzârgâh mukāta‘ası mülteziminden gayr-ez bedel-i iltizâm yedi yüz elli guruş ve Çalıköy ve Elvândere mukāta‘ası mülteziminden kezâlik gayr-ez bedel-i iltizâm yüz altmış beş guruş ki cem‘an harc-ı bâb nâmıyla dokuz yüz on beş guruş kabzını i‘tirâf ve meblağ-ı mezbûru dahi beher sene ma‘rifet-i şer‘le rü’yet olunan muhasebâta dâhil tezkire-i evvel maaşı olan bin guruşdan müddet-i mezkûrede iktizâ eden hissesine mahsûb edüp maaş-ı mezkûru taleb etmemek üzere her birimizin âhar ile husûs-ı mezkûra müte‘allika kat‘a da‘vâ ve nizâ‘ımız kalmayup fîmâ ba‘d dahi vakf-ı müşârun-ileyhimânın vezâyif-i mürtezika ve mesârif-i mu‘tâdesini rü’yet-birle mesârif-i mu‘tâdenin gayrı lede’l-iktizâ zuhûr eden ta‘mîrat ve levâzım-ı sâiresi müfettiş-i mûmâ-ileyh tarafına ihbâr olunup mesmûğ-ı şer‘îye binâen izn-i hâkim-i şer‘le olan mesârif makbulün-bih olarak beher şehr bi’t-tevliye benimle idâreye memûr tezkire-i evvel hâzır-ı mûmâ-ileyh bi’l-ma‘iyye rü’yet-i hesâb edüp tarafeynin hatemleriyle bir kıt‘a şehriye defteri tahrîr ve ba‘dehû şürût-ı vakıf üzere her üç ayda bir def‘a cem‘ ederek müstakil bir kıt‘a defter tahrîr ve müfredâtı şer‘-i şerîfe mutâbık olduğu takdîrce sahh-ı âlî ile tezyîn buyrulup re’s-i senede müfettiş-i mûmâ-ileyh huzûrunda muhâsebesini rü’yet [60a] ve ba‘de’l-yevm evlâd-ı vâkıfdan mütevellî olmamla benimle tezkire-i evvel mûmâ-ileyh bi’l-ittifâk umûr-ı vakfı şer‘-i şerîfe tatbîk ederek idâre etmek üzere her birimiz ta‘ahhüd ve ittifâk eyledik deyü mütevellî-i mûmâ-ileyh Yusuf Bey’in bi’t-tevliye eylediği ikrâr u i‘tirâfını mûmâ-ileyh Abdülhamid Beyefendi ve hâzır-ı mûmâ-ileyh tezkire-i evvel Salih Efendi tasdîk eyledikleri ba‘de’t-tescîl İstanbul Mahkemesi’nden huzûr [-ı âlîlerine i‘lâm olundu.] Fî 19 C sene 1237