İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 324 Hüküm no: 300 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Yordan v. Andon’un, Seyyid Halil Efendi b. Hasan’a olan borcunu ödemesi gerektiği 4.387 guruş sebîlini tahliye iktizâsıyla hüküm Ma‘rûz-ı dâ‘î [-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâlde mezkûrü’l-ism müteveffâ Zaralizâde Mustafa Bey dâmâdı mektûbi kalemi hulefâsından es-Seyyid Halil Efendi b. Hasan meclis-i şer‘-i enverde zikri âtî deyni içün habsettirdiği sâhib-i arzuhâl Çerkes Mehmed Bey b. Hasan nâm kimesne muvâcehesinde İstanbul’da Astarcılar hanında mütemekkin Sarraf Yordan v. Andon nâm zimmî hâzır olduğu hâlde işbu bin iki yüz otuz yedi senesi Cemâziyelevvelîsi’nin yirminci günü târihiyle müverrah ve hâlâ sudûrü’l-akder-i Rumeli Fazîletlü Semahatlü Sıdkızâde Ahmed Reşid Efendi hazretlerinin hatmiyle mahtûm yedimde olan bir kıt‘a i‘lâm-ı şer‘î mantûkunca merkūm Çerkes Mehmed Bey zimmetinde cihet-i karz-ı şer‘îden mahkûmun-bih dört bin üç yüz seksen yedi guruş alacak hakkım olmağla mezbûr Çerkes Mehmed Bey zimmetinde cihet-i mezkûreden bana deyni olan meblağ-ı mahkûmun-bih mezkûr dört bin üç yüz seksen yedi guruş ile beni havâle-i mutlaka-yı sahîha-i şer‘iyye ile işbu meclis-i şer‘de hâzır-ı mesfûr Sarraf Yordan zimmî üzerine bi’l-muvâcehe havâle eylediğinde her birimiz havâle-i mezkûreyi kabûl etmemizle hâzır-ı mersûm Sarraf Yordan zimmî cihet-i havâleden zimmetinde bana deyni olan meblağ-ı muhtâllün-bih merkūm dört bin üç yüz seksen yedi guruşun iki bin üç yüz seksen yedi guruşunu işbu târih-i i‘lâm senesi Şa‘bâni’l-mu‘azzamının on üçüncü gününde ve mâ‘adâsı olan iki bin guruşunu kezâlik târih-i i‘lâmdan altmış bir gün tamamında bana edâ etmek üzere istimhâl eylediğinde ben dahi ber-vech-i muharrer imhâl ve tehîr eyledim deyü merkūm es-Seyyid Halil Efendi’nin bi’l-cümle sâdır olan kelimât-ı meşrûhasını mezbûr Çerkes Mehmed Bey ve hâzır-ı mersûm Sarraf Yordan zimmî ikrâr ve tasdîk ve cihet-i havâle-i mezkûreden zimmetinde deyni olan meblağ-ı merkūm dört bin üç yüz seksen yedi guruşu müddet-i mezkûre tamamında ber-vech-i muharrer merkūm es-Seyyid Halil Efendi’ye edâya hâzır-ı mesfûr Sarraf Yordan zimmî ta‘ahhüd etmekle ol vechile havâle-i merkūmeye binâen mahbûs-ı merkūmun sebîli tahliye olunmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 26 Receb sene 1237