İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 323 Hüküm no: 299 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefaletinden dolayı Seyyid Hâfız Mustafa Efendi’nin, Mehmed Efendi b. Hüseyin’e olan borcunu ödemesi gerektiği 8637,5 guruş 20 akçe kefâle hüküm Ma‘rûz-ı dâ‘î-i devlet-i aliyyeleridir ki Mübârek rikāb-ı kamer-tâb-ı hazret-i şehinşâhîye takdîm olunan işbu arzuhâlde mezkûrü’l-ism Harputlu es-Seyyid el-Hâc Mehmed Efendi b. Hüseyin Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i enverde sâhib-i arzuhâl Trabzonî es-Seyyid el-Hâc Hâfız Mustafa Efendi b. es-Seyyid el-Hâc Mehmed muvâcehesinde merkūm es-Seyyid el-Hâc Hâfız Mustafa Efendi’nin sulbî kebîr oğlu es-Seyyid Hasan Ağa hâzır olduğu hâlde bin iki yüz otuz altı senesi Muharremi’l-harâmının yirmi yedinci günü târihiyle müverrah ve ol târihde İstanbul’da Mahmudpaşa mahkemesi nâibi olan müderrisîn-i kirâmdan Mehmed Raif Efendi hatmiyle mahtûm işbu yedimde olan bir kıt‘a i‘lâm-ı şer‘î mantûkunca mezbûr es-Seyyid el-Hâc Hâfız Mustafa Efendi zimmetinde cihet-i karzdan mahkûmun-bih alacak hakkım olan beş bin sekiz yüz elli guruşun bin sekiz yüz elli guruşunu bundan akdem rızâmla hat ve tenzîl etmemle ol vechile merkūm es-Seyyid el-Hâc Hâfız Mustafa Efendi’nin zimmetinde bâkī alacak hakkım olan dört bin guruş ile meblağ-ı bâkī-i merkūm içün ilzâm-ı ribh-i şer‘î kasdıyla semeni işbu bin iki yüz otuz yedi senesi Muharremi’l-harâmının dördüncü gününden bir sene tamamına değin müeccelen mâlımdan merkūm es-Seyyid el-Hâc Hâfız Mustafa Efendi’ye bey‘ ve teslîm eylediğim bir kıt‘a Mushaf-ı şerîf hediyesinden dahi zimmetinde alacak hakkım olan altı yüz guruşdan işbu târih-i i‘lâma gelince ecel-i merkūmdan hulûl eden altı ay yirmi sekiz gün müddetde lâzım gelen üç yüz kırk altı buçuk guruş yirmi akçe ki cem‘an dört bin üç yüz kırk altı buçuk guruş yirmi akçe ile oğlu hâzır-ı mezbûr es-Seyyid Hasan Ağa zimmetinde işbu yedimde olan bin iki yüz otuz altı senesi şehr-i Rebî‘ülâhiri gurresi târihiyle müverrah bir kıt‘a temessük mantûkunca cihet-i karz-ı şer‘îden alacak hakkım olan dört bin iki yüz doksan bir guruşa tarafeynden bi’l-emr ve’l-kabûl merkūm es-Seyyid el-Hâc Hâfız Mustafa Efendi kefîl bi’l-mâl ve dâmin olmağla kefâlet-i mahkiyesine binâen meblağ-ı merkūm dört bin iki yüz doksan bir guruş ki min-haysü’l-mecmû‘ sekiz bin altı yüz otuz yedi buçuk guruş yirmi akçeyi asâlet ve kefâlet-i merkūmeye binâen müstakillen merkūm es-Seyyid el-Hâc Hâfız Mustafa Efendi’den taleb ederim deyü ba‘de’d-da‘vâ ve’l-istintak mezbûr es-Seyyid el-Hâc Hâfız Mustafa Efendi oğlu hâzır-ı mezbûrun dahi tasdîkiyle cevâbında müdde‘î-i merkūmun da‘vâ-yı mezkûresini bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi meblağ-ı mecmû‘-ı merkūm sekiz bin altı yüz otuz yedi buçuk guruş yirmi akçenin bi’t-taleb müdde‘î-i mezbûr es-Seyyid el-Hâc Mehmed Efendi’ye asâleten ve kefâleten edâsıyla merkūm es-Seyyid el-Hâc Hâfız Mustafa Efendi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 2 Ş sene [1]237