İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 325 Hüküm no: 302 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berat gecesinde cami ve mescitlerin aydınlatılması Sübût-ı berât-ı şerîf Ma‘rûz-ı dâ‘î [-i devlet-i aliyyeleridir ki] İstanbul Kādısı fazîletlü efendi İşbu i‘lâmınız rikāb-ı hümâyûn-ı mülûkâneye arz ile meşmûl-ı enzâr-ı cenâb-ı cihândâri olmağla mûcebince leyle-i merkūmede îkād-ı kanâdil olunması husûsu iktizâ edenlere tenbîhe mübâderet eyleyesin deyü buyruldu. Fî 12 Ş sene 1237 Dergâh-ı felek-penâh ve bârgâh-ı adâlet-destgâh-ı türâbına Ma‘rûz-ı dâ‘î-i bî-iştibâhdır ki İşbu mâh-ı Şa‘bâni’l-mu‘azzam gurre-i garrâsı yevm-i isneyn olduğu bi’r-rü’ye vech-i vecih-i şer‘î üzere mahzar-ı hasm-ı câhidde da‘vâ-yı sahîha-i şer‘iyye zımnında şâhideyn-i âdileyn şehâdetleriyle sâbit ve mütehakkık ve yevm-i mezkûr-ı evvel i‘dâ ve şehr-i şerîf-i mağfiret-redîf-i mezbûr olduğuna hükm-i şer‘î lâhık olmağla işbu on beşinci Pazartesi gecesi leyle-i berât-ı mağfiret-âyât olup leyle-i mübâreke-i merkūmeye ihtirâmen minârât-ı cevâmi‘ ve mesâcid îkād-ı kanâdil ile tezyîn buyrulmak kā‘ide-i kadîme-i devlet-i aliyye ve dîdene-i müstahsene-i saltanat-ı seniyye olmağla leyle-i şerîfe-i merkūmede vetîre-i müstahsene-i merkūmenin icrâsı bâbında tenbîhi hâvî fermân-ı cihan-mutâ‘ları sudûru iktizâ eylediği İstanbul Mahkemesi’nden atebe-i ulyâlarına i‘lâm olundu ol bâbda emr ve fermân hazret-i men lehu’l-emrindir. Fi’l-yevmi’l-hâdi aşer min-Şa‘bâni’l-mu‘azzam li-sene seb‘a ve mi’eteyn ve elf