İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 326 Hüküm no: 303 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İdris Ağa’nın kiracısı olduğu kahveci dükkânını tahliye ederek Mehmed Efendi b. Ahmed’e teslim etmesi gerektiği Ebu’l-feth Sultan Mehmed Câmi‘-i şerîf havlîsinde bir bâb kahve gediği tahliyeye tenbîh Ma‘rûz-ı dâ‘î [-i devlet-i aliyyeleridir ki] Sâhibetey-i arzuhâlden zâtı mu‘arrefe Şerîfe Rukiye Hanım bt. es-Seyyid Mehmed Efendi asâleten vâlidesi Mahbûbe Kadın bt. Abdullah b. Abdullah tarafından husûs-ı âtîde vekîl olduğu zâtını ârifân Yusuf Ağa b. Mustafa ve İbrahim Ağa b. Mehmed nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit olan es-Seyyid el-Hâc Mehmed Efendi b. es-Seyyid el-Hâc Ahmed hâzır olduğu hâlde bi’l-ma‘iyye rü’yete memûr nezâret-i hazret-i Sadâret-penâhîde âsûde evkāf müfettişi müderrisîn-i kirâm-ı zevi’l-ihtirâmdan fazîletlü Mehmed Said Efendi dâ‘îleri tarafından me’zûnen mürsel Kâtib Mehmed Nuri Efendi kezâlik hâzır olduğu hâlde İstanbul mahkemesinde meclis-i şer‘-i münîrde bundan akdem vefât eden Emine Hanım bt. Mehmed Emin Efendi’nin verâseti zevc-i metrûku es-Seyyid İdris Ağa b. İdris ile li-ebeveyn kız karındaşı Fâtıma Hanım’a ba‘de’l-inhisâr [62a] mezbûre Fâtıma Hanım tarafından husûs-ı âtîde vekîl-i sâbitü’l-vekâlesi olup zikri âtî bir bâb dükkânın müstakillen asâleten müsteciri olan derûn-ı arzuhâlde ismi mezkûr zevc-i merkūm es-Seyyid İdris Ağa muvâcehesinde nezâret-i hazret-i müşârun-ileyhde âsûde evkāfdan cennet-mekân-ı merhûm ve mağfiret-nişan Ebu’l-feth Sultan Mehmed Hân -aleyhi’r-rahmetü ve’l-gufrân- hazretlerinin evkāf-ı şerîf[e]lerinden merhûm-ı müşârun-ileyh hazretlerinin İstanbul’da vâki‘ câmi‘-i şerîfleri havlusunda vâki‘ muvakkit odası tarafından boyacı kapısına giderken üçüncüye tesadüf eden bir bâb ve ittisâlinde kâin bir bâb ki cem‘an mukaddemâ iki ve hâlâ bir bâb dükkân ve altı sehm i‘tibâriyle bir sehmi benim ve beş sehmi vâlidem müvekkile-i mezbûre Mahbûbe Kadın’ın bâ-re’y-i mütevellî bi’l-icâreteyn iştirâken tasarrufumuzda ve dükkân-ı mezkûrda şehriye onar guruş kirâ ile mezbûr es-Seyyid İdris Ağa kahve dükkânı olarak müstakillen müstecir olup lâkin dükkân-ı merkūmun bize lüzûmu olup hâmiş-i arzuhâlimizde mastûr derkenâr nâtık olduğu üzere dükkân-ı merkūm derûnunda aklâm-ı pâdişâhîde mukayyed mu‘teber gedik dahi olmamağın işbu târih-i i‘lâm şehri gāyetine izâfetle fesh-i îcâr etmemizle gāyet-i şehr-i merkūmda dükkân-ı merkūmu tahliye ve bize teslîme ve dükkân-ı merkūm kirâsından sene-i sâbıkā Zilka‘deti’ş-şerîfesi gurresinden işbu târih-i i‘lâm senesi şehr-i Recebi’l-ferdi gāyetine gelince beher şehr onar guruşdan dokuz ayda zimmetinde müctemi‘ olan doksan guruşu bize edâya merkūm es-Seyyid İdris Ağa’ya tenbîh olunmak benim ve vâlidem müvekkile-i mezbûre Mahbûbe Kadın’ın matlûbumuzdur deyü hâzır-ı vekîl-i mezbûr es-Seyyid el-Hâc Mehmed Efendi’nin tasdîkiyle da‘vâ ettikte mezbûr es-Seyyid İdris Ağa cevâbında dükkân-ı merkūmda kahve dükkânı olarak ber-vech-i muharrer müsteciri olup zimmetinde ancak beşer buçuk aylık elli beş guruş kirâ müctemi‘ olduğunu ve hâmiş-i arzuhâlde muharrer derkenâr mûcebince derûnunda aklâmda mukayyed gedik olmadığını ikrâr ziyâde üç buçuk aylık kirâ müdde‘âlarını inkârından gayrı zikr olunan mukaddemâ iki bâb ve hâlâ bir bâb dükkân kahveci dükkânı olup derûnunda mevcûde ber-mûceb-i defter-i müfredât kahveci eşyası olan âlât-ı lâzıme-i ma‘lûmeyi mukaddemâ müstecirleri mülk sâhiblerinin rızâlarıyla gedik i‘tibâr edüp bâ-hücec-i şer‘iyye bey‘ u şirâ olunarak eşyâ-i mezkûre mûrisem zevcem müteveffâ-i mezbûre Emine Hanım’ın ile’l-vefât yedinde mülk-i müşterâsı olup ba‘de vefâtihâ benimle kız karındaşı müvekkile-i mezbûreye mevrûs olmağla ol vechile dükkân-ı mezkûrda mevcûde eşya ile dükkân-ı merkūm mu‘teber gediğimizdir demesi meşrû‘a olmadığından mâ‘adâ gedik nizâmının şürûtu bir husûsun devam ve istikrârı irâdesiyle aklâm-ı Pâdişâhîden birinde bâ-fermân-ı âlî mukayyed olmadığı takdîrce kānûnen dahi mu‘teber olmadığı kendüye tefhîm ve ve gedik da‘vâsıyla bî-vech-i şer‘î ve mugāyir-i kānûn mu‘ârazadan ba‘de’l-men‘ müdde‘iye-i mezbûre ile hâzır-ı vekîl-i merkūm ziyâde kirâ mutâlebelerinden fâriğler olmalarıyla ikrârıyla lâzım gelen beşer buçuk aylık elli beş guruş kirâ ile gāyet-i şehr-i merkūmda dükkân-ı merkūmu tahliye ve müdde‘iye-i mezbûre ile vekîl-i hâzır-ı merkūm es-Seyyid el-Hâc Mehmed Efendi’ye mezbûr es-Seyyid İdris Ağa’nın def‘ ve teslîmi iktizâ eylediği huzûr-ı âlîlerine i‘lâm olundu. Fî 2 Şa‘bân sene 1237