İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 327 Hüküm no: 304 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahtiyâncı İstefan’ın, Ohan v. Agob aleyhine açtığı davada iddiasını ispat edemediğinden muarazadan men edildiği İki kıt‘a poliçe temessüklerini istirdâd ederim demesi meşrû‘a olmadığı kendüye tefhîm Ma‘rûz-ı dâ‘î [-i devlet-i aliyyeleridir ki] Sâhibey-i arzuhâlden Sahtiyâncı İstefan zimmî li-ebeveyn er karındaşı Sahtiyâncı Ohan zimmî hâzır olduğu hâlde meclis-i şer‘-i münîrde derûn-ı arzuhâlde mastûrü’l-ism Vezir Hanı sarraflarından Ohan v. Agob zimmî muvâcehesinde Anadolu’da Eğin kasabasında mütemekkin babamız debbâğ Uzunoğlu Aleksan v. Ohan zimmî bin iki yüz otuz dört senesi hılâlinde bir def‘a yedi bin yedi yüz guruş ve iki yüz otuz beş senesi hılâlinde bir def‘a sekiz bin guruş ve bir def‘a dahi yedi bin guruş ki üç defada cem‘an yirmi iki bin yedi yüz guruş kasaba-i mezbûrede mütemekkin kasab oğlu Bedros v. İstefan zimmîden üç kıt‘a poliçe temessükü nâtık olduğu üzere seftece tarîkiyle iktirâz ve kabz ve meblağ-ı mecmû‘-ı mezkûr içün mesfûr Bedros zimmîye i‘tâ eylediği temessükât-ı mezkûreyi mersûm Bedros zimmî işbu mesfûr Sarraf Ohan zimmîye gönderip sarraf-ı mesfûr dahi sipârişi üzere bana getirüp irâde-i havâle-i mezkûreyi ifâde ve i‘lâm eylediğinde ben dahi tasdîk ve seftece-i mezbûreyi kabûl ve meblağ-ı mecmû‘-ı mezkûr yirmi iki bin yedi yüz guruş gedik gerek kendi yediyle gerek karındaşım hâzır-ı mesfûr yediyle sarraf-ı mersûm Ohan zimmîye tamamen edâ ve teslîm edüp lâkin ben meblağ-ı mecmû‘-ı mezkûru vâdeleri hulûlünde edâ eylediğimden kā‘ide-i sarrafan üzere sarraf-ı mersûm bilâ-devr murâbaha nâmıyla mâlımdan bir def‘a iki yüz guruş ve bir def‘a altı yüz guruş ve bir def‘a dahi yüz on bir buçuk guruş ki üç defada cem‘an dokuz yüz on bir buçuk guruşumu aldığından mâ‘adâ ancak sekiz bin guruşu nâtık bir kıt‘a poliçe temessükü yedime i‘tâ edüp âhar iki kıt‘a poliçe temessükleri dahi yedinde kalmağla bir devir murâbaha nâmıyla me’hûzu olan meblağ-ı mezkûr dokuz yüz on bir buçuk guruş ile iki kıt‘a poliçe temessükünü bana red ve teslîme sarraf-ı mersûm Ohan zimmîye tenbîh olunmak matlûbumdur deyü karındaşı hâzır-ı mesfûrun tasdîkiyle da‘vâ ettikte sarraf-ı mersûm dahi cevâbında üç kıt‘a poliçe temessükü mantûkunca müdde‘î-i mesfûr İstefan zimmîden bi-tarîkı’l-havâle meblağ-ı mezkûr yirmi iki bin yedi yüz guruşu tamamen kabz ve poliçe temessüklerini kendüye aynen teslîm edüp ve meblağ-ı mezkûr içün iki defada bilâ-devr murâbaha nâmıyla ancak altı yüz doksan yedi buçuk guruşu ahzını ikrâr ziyâde iki yüz on dört guruşunu ahzını ve müdde‘î-i mersûm dahi iki kıt‘a poliçe temessükünü kabzını ba‘de’l-inkâr müdde‘î-i mersûm ziyâde iki yüz on dört guruş müdde‘âsına ve sarraf-ı mesfûr iki kıt‘a temessükü teslîmine her biri ikāmet-i beyyine eyleyemeyüp tahlîfe dahi tâlibler olmamağın mûcebince müdde‘î-i mesfûr İstefan zimmî ziyâde iki yüz on dört guruş müdde‘âsıyla sarraf-ı mesfûra bilâ-beyyine mu‘ârazadan ba‘de’l-men‘ sarraf-ı mezfûr ikrârı üzere reddi lâzım gelen meblağ-ı mezkûr altı yüz doksan yedi buçuk guruşu müdde‘î-i mersûma red ve teslîme ba‘de’t-ta‘ahhüd sâlifü’l-beyân iki kıt‘a temessüklerinin kıymetleri olan on parayı dahi müdde‘î-i mesfûra damânen edâya râzı iken müdde‘î-i mesfûr kabûl etmeyüp mücerred deyn temessükleri mutâlebe ve temessükleri [62b] bulup bana vermediği takdîrce edâ eylediğim poliçeleri istirdâd ederim demesi meşrû‘a olmadığı kendüye tefhîm ve temessük-ı mezkûr mutâlebesi ve poliçe istirdâdıyla bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 21 Receb sene 1237