İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 329 Hüküm no: 306 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed Efendi b. Mustafa’nın, Manastır Mescidi vakfı arazisi ile ilgili açtığı davanın mahallinde görülmesi gerektiği Hitâbet tevcîhini mahallinde terâfu‘a ihâle Ma‘rûz[-ı dâ‘î-i devlet-i aliyyeleridir ki] Vilâyet-i Anadoluda Hâmid sancağında Burdur kasabası ahâlîsinden sâhib-i arzuhâl es-Seyyid Ahmed Efendi b. es-Seyyid Mustafa nâm kimesne İstanbul mahkemesinde meclis-i şer‘de derûn-ı arzuhâlde mezkûrü’l-isim kasaba-i mezbûre ahâlîsinden Câmi‘-i kebîr Hatibi el-Hâc İshak Efendi b. Çeşmecizâde eş-Şeyh Mahmud mahzarında hâmiş-i arzuhâlde mastûr derkenâr nâtık olunduğu üzere sâlifü’l-beyân Burdur kasabasında vâki‘ bâ-berât-ı âlîşân yevmî beş akçe vazîfe ile imâm ve mütevellîsi olduğum Manastır mescid-i şerîfi Vakfı arâzisinden yedimde olan defter-i hâkānî mûcebince kasaba-i mezbûre hudûdu dâhilinde Katı Nâiboğlu bağı ve Harimi nâm bir pâre mahalli mezbûr el-Hâc İshak Efendi mârru’z--zikr Câmi‘-i kebîr hatîbi olanlara meşrûtadır diyerek fuzûlî bi-gayr-ı hak zabt ve te‘ayyüş etmekle keff-i yedine tenbîh olunmak murâdımdır deyü dava ettikte merkūm el-Hâc İshak Efendi dahi cevâbında zikr olunan bir pâre mahalli seksen üç seneden berü bilâ-nizâ‘ câmi‘-i kebîrde hatîb olan efendiler Osman Bey ve Külahçı Harimi nâmıyla hitâbete meştura olarak zabt ve te‘ayyüş edegelmişlerdir deyü sâlifü’l-beyân Manastır Mescidi vakfından olduğunu inkâr edüp lâkin husûs-ı mezkûr arâzi nizâ‘ından olmağla tarafeyn mahallinde kasaba-i mezbûre nâibi efendi huzûrunda mahâll-i nizâ‘ üzerinde ta‘yîn-i hudûd ederek terâfu‘-i şer‘-i şerîf olunmak iktizâ eylediği tarafeyne tefhîm olunmağla husûs-ı mezkûr içün mârru’z--zikr Burdur kazâsı nâibi efendi dâ‘îlerine hitâben bâlâsı tuğra-yı garrâ ile mu‘anven bir kıt‘a fermân-ı âlîşân sudûrunu tarafeyn istid‘â eyledikleri huzûr-ı âlîlerine i‘lâm olundu. Fî 21 Şa‘bân sene 1237