İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 329 Hüküm no: 307 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acı oğlu Hayem v. Sabatay’ın malik olduğu saçakcı gediğini Kazzâz Bezci oğlu Menteş’e sattığı Saçakcı gediğini sûret-i istid‘âsı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ kolancı esnâfına tâbi‘ bağcı ve saçakçı esnâfı tâ‘bir olunur envâ‘-ı saçak ve altın ve gümüşden tespih harcı ve devât ve sa‘at ve bıçak köstekleri döşeme ve emsâli olan emti‘ayı nesc ve i‘mâl eden esnâfın mütemekkin oldukları İstanbul’da Çarşı-yı Kebîr’de vâki‘ altı bâb saçakçı ve on altı bâb bağcı dükkânlarından zikr-i ati bir bâb saçakçı dükkânı gediğine mâlik olan Acı oğlu Hayem v. Sabatay nâm Yahûdi meclis-i şer‘-i münîrde Kazzâz Bezci oğlu Menteş v. Tavid nâm Yahûdi muvâcehesinde mahmiye-i İstanbul’da Çarşı-yı Kebîr’de Peçeci? sokağında vâki‘ bir tarafdan mesfûr Bezcioğlu Menteş Yahûdi ve bir tarafdan Kazzâz Akna zimmî dükkânları ile mahdûd bir bâb saçakçı dükkânı derûnunda mevcûde beyne’l-esnâf gedik tâ‘bir olunur işbu bir kıt‘a sûret mantûkunca mukayyed ve mu‘teber akd-i âti’z-zikrin sudûruna değin yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile kethüdâ ve yiğitbaşı hâzır oldukları hâlde mesfûr Kazzâz Bezci oğlu Menteş Yahûdi’ye iki bin guruş semen-i makbûza bey‘ ve temlîk ve teslîm eylediğimde ol dahi yedimden iştirâ ve temellük ve tesellüm kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt etmemizle fîmâ ba‘d zikr olunan saçakçı gediği tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup mesfûr Kazzâz Bezci oğlu Menteş Yahûdi’nin mâl-ı müşterâsı olmuşdur deyü ba‘de’l-ikrâr ve’t-tasdîk zikr olunan saçakçı gediği âlât-ı lâzımesinin kaleminde bâyi‘-i mesfûr Acı oğlu Hayim Yahûdi üzerinde olan kayd-ı atîki ref‘ [63a] ve terkīn ve yedinde olan sûreti battâlda hıfz ve şürût-ı sâbıkāsı derciyle müşteri-i mersûm Kazzâz Bezci oğlu Menteş Yahûdi ismine kayd [ve] müceddeden sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 18 Ş sene 1237