İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 331 Hüküm no: 310 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salı günü Ramazan hilali görülmez ise Çarşamba günü Ramazan orucuna başlanılacağının ilanı Sübût-ı Ramazan İstanbul Kādısı Fazîletli Efendi İşbu i‘lâmınız rikāb-ı hümâyûn-ı mülûkâneye arz ile şümûl-i enzâr-ı cenâb-ı Padişâhî olmağla Salı gecesi hilâl rü’yet olunmaz ise Çarşamba gecesi ber-mûceb-i i‘lâm îkād-ı kanâdil oluna iktizâ edenlere tenbîhe mübâderet eyleyesin deyü buyruldu. Fî 28 Ş sene [12]37 Matla‘-ı ahd-i? devlet ve ikbâl olan südde-i seniyye-i bâhiretü’l-iclâlehu bi’t-tasarrû‘ ve’l-ibtihâl ber-dâşte-i dâ‘i-i ubûdiyet-iştimâlleridir ki İşbu bin iki yüz otuz yedi senesi Şa‘bâni’l-mu‘azzamı gurresi hasbe’r-rü’ye yevm-i isneyn olduğu ber-nehc-i şer‘î sâbit ve ol vechile hükm-i şer‘î lâhık olmağla işbu pazartesi günü yirmi dokuzu olup ferdâsı selhi olan Salı gecesi hilâl-i Ramazan-ı kesîrü’l-feyezân rü’yet ve müşâhede olunmaz ise Şa‘bâni’l-mu‘azzam selâsin ile ba‘de’l-itmâm Çarşamba günü şer‘an gurre-i şehr-i mübârek-i sıyâm olduğunu tebşîr ve ilân ve sürûr-endâz-ı kulûb-ı ehl-i îmân olunmak içün leyle-i mübâreke-i merkūmede de’b-i dirîn-i devlet-i aliyye-i Osmaniye -lâ zâlet mahfûzeten fi’l-himayeti’r-Rabbâniye- üzere minârât-ı cevâmi‘ ve mesâcid îkād-ı kanâdil ile tezyîn olunmak bâbında ve tenbîhi hâvî fermân-ı cihân-mutâ‘-ı vâcibü’l-ittibâ‘ları sudûru iktizâ eylediği İstanbul Mahkemesi’nden âsitân-ı âsumân-tev’emlerine i‘lâm olundu. Bâkīyü’l-emr li-hazreti veliyyü’n-ni‘meti ve’l-ihsân. Fî 27 Ş sene [1]237