İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 332 Hüküm no: 311 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menteş v. Mosi’nin malik olduğu ipekçi dükkanı gediğini İsak v. Mosi’ye sattığı Kazzâz gediği Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ kazzâz esnâfından Menteş v. Mosi nâm Yahûdi meclis-i şer‘-i münîrde Kazzâzlar Kethüdâsı Abdüllatif Ağa ve Yiğitbaşı Mehmed hâzır oldukları hâlde İsak v. diğer Mosi nâm Yahûdi muvâcehesinde İstanbul’da Çarşı-yı Kebîr’de takyeciler sûkunda vâki‘ tarafeyni Kazzâz İsrail ve Saçakçı Yahûdileri dükkânları ile mahdûd iki kepenkli bir bâb kazzâz dükkânı derûnunda mevcûde iki gedik i‘tibâriyle başmuhâsebe kalemine kaydolunup zikr olunan dükkânın bir kepenk ve bir gediğini ifrâz ve Avaram nâm Yahûdi’ye semen-i makbûza mukaddemâ bey‘ ve bir gediği hâlâ yedimde ibkā edüp akd-i âti’z-zikrin sudûruna değin bir kıt‘a sûret mantûkunca yedimde mülküm olmağla hâlâ ben ber-vech-i muharrer mâlik olduğum bir kepenk bir gediğimi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin mersûm İsak Yahûdiye iki bin beş yüz guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ [63b] ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d zikr olunan kazzâz dükkânının bir kepenk bir gedik i‘tibâr olunan âlât-ı lâzıme-i ma‘lûmesi mersûm İsak Yahûdinin mülk-i müşterâsı olup benim kat‘â alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i mezkûre kaleminde mesfûr Menteş Yahûdi üzerine olan kayd-ı atîki ref‘ ve terkīn ve yedinde olan sûreti battâlda hıfz-birle mersûm İsak Yahûdi ismine kayd ve yedine nizâmları şürûtu üzere müceddeden bir kıt‘a sûret i‘tâsı bâbında istid‘â-yı inâyet etmeğin istid‘âsı üzere gedik-i mezkûrdan i‘tibâr-ı merkūm üzere bir kepenk bir gedik mesfûr Menteş Yahûdi üzerinde olan kaydı ref‘ ve terkīn ve müşteri-i mersûm İsak Yahûdi ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-selh-i Şa‘ban sene 1237