İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 336 Hüküm no: 315 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokoz v. Agob’un malik olduğu ipekçi gediğini Viçen v. Serope’ye sattığı Kazzâz gediği mübâya‘asıdır Ma‘rûz-ı dâ‘î [-i devlet-i aliyyeleridir ki] Mahmiye-i İstanbul’da vâki‘ kazzâz esnâfından Kokoz v. Agob nâm zimmî meclis-i şer‘-i münîrde yine esnâf-ı merkūmeden Viçen v. Serope nâm zimmî muvâcehesinde mahmiye-i mezbûrede Çarşı-yı Kebîr’de takyeciler sûkunda vâki‘ tarafeyni bağcı Yahûdiler dükkânları beynlerinde kâin bir kepenk bir bâb kazzâz dükkânı derûnunda mevcûde akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan beyne’l-hiref gedik tâ‘bir olunur âlât-ı lâzıme-i ma‘lûmemi tarafeyden bi’l-îcâb ve’l-kabûl bâtten ve sahîhan bi-safkatin vâhidetin beş bin üç yüz guruş semen-i makbûza mersûm Viçen zimmîye bey‘ ve temlîk ve teslîm eylediğimde ol dahi yedimde iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d zikr olunan bir kepenk bir gedik tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup mersûm Viçen zimmînin mülk-i müşterâsı ve hakk-ı sırfı olmuşdur deyü esnâf-ı mezkûre kethüdâsı Abdüllatif Ağa ve Yiğitbaşı Molla Mehmed ve sâir mazbûtü’l-esâmî kazzâz ustaları hâzır oldukları hâlde ba‘de’l-ikrâr ve’t-tasdîk zikr olunan bir kepenk bir gedik tâ‘bir olunur kazzâz âlât-ı lâzımesinin mesfûr Kokoz zimmî üzerinde olan kayd-ı atîki ref‘ ve terkīn ve kendi ismine kayd ile yedine sûret i‘tâ buyrulmak bâbında mesfûr Viçen zimmî istid‘â-yı inâyet etmeğin istid‘âsı üzere gedik-i mezkûrun kaleminde mesfûr Kokoz zimmî üzerinde olan kayd-ı atîki ref‘ ve terkīn ve yedinde olan sûreti battâlda hıfz ile mesfûr Viçen zimmînin üzerine kayd ve şürût-ı sâbıkāsı derciyle müceddeden yedine sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 6 N sene [12]37