İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 338 Hüküm no: 318 Orijinal metin no: [64b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salı günü Ramazan’ın başladığının ve Pazar gününün kadir gecesi olduğunun ilanı Gurre-i Ramazanı salıdan isbât İstanbul Kādısı fazîletlü efendi İşbu i‘lâmınız rikāb-ı hümâyûn-ı mülûkâneye lede’l-arz manzûr-ı cenâb-ı padişâhî olmağla mûcebince Pazar gecesi leyle-i kadr ve yevm-i hâmis îd-i şerîf olmağla iktizâ edenlere mübâderet eyleyesin deyü Fî 17 N sene 1237 Dergâh-ı felek-medâr ve bârgâh-ı gerdûn-iktidâr türâbına ma‘rûz-ı dâ‘î-i bî-mikdâr oldur ki İşbu şehr-i Ramazani’l-mübâreğin gurresi rü’yet ile sâbit olmayup hasbe’r-rü’ye yevm-i isneynden sübût-ı Şa‘bâni’l-mu‘azzama binâen tekmîl-i selâsin ile Çarşamba gününden sıyâma bed’ olunmuş idi lâkin şehr-i Recebi’l-ferdin selhi i‘tibâr ile olunan Pazar gecesi vakt-i gurûbda mahrûse-i Edirne’de Yıldırım ve Tekkekapu nâm mahallerde havâda gaym olduğu hâlde hilâl-i Şa‘bânı beyne’s-sehâbîn iki üçleri kıbleye müteveccih olarak re’yü’l-ayn müşâhede eyledik ol vechile gurre-i Şa‘bâni’l-mu‘azzam yevm-i ehadden ve tekmîl-i selâsin ile Salı günü gurre-i şehr-i Ramazani’l-mübârek olduğuna şâhidleriz deyü mahrûse-i mezbûre ahâlîsinden Müezzin es-Seyyid Molla Mustafa b. Ahmed ve Müezzin es-Seyyid Molla Mehmed Kâmil b. Ahmed nâm şâhideyn-i ma‘deleyn mahmiye-i İstanbul’da meclis-i şer‘de da‘vâ-yı sahîha-i şer‘iyye zımnında mahzar-ı hasm-ı câhidde [65a] vech-i şer‘î üzere edâ-yı şehâdet-i şer‘iyye ettiklerinde şehâdetleri makbule olmağın mûcebince ba‘de’l-hükm gurre-i şehr-i mübârek-i sıyâm yevm-i salıdan olup ve işbu Salı günü on beşinci günü olmağın yirmi yedinci pazargecesi leyletü’l-kadr ve tekmîl-i selâsin ile hâmis günü îd-i şerîf olmak iktizâ eylediği İstanbul Mahkemesi’nden atebe-i ulyâlarına i‘lâm olundu. Fi’l-yevmi’l-hâmis aşer min-şehr-i Ramazan li-sene seb‘a ve selâsin ve mi’eteyn ve elf