İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 338 Hüküm no: 319 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah’ın, Berber Ömer Ağa ve Hadice Hatun aleyhine açtığı arsa davasında iddiasını ispat edemediğinden muarazadan men edildiği Arsa-yı sırfa nizâ‘ından men‘ Ma‘rûz-ı dâ‘î [-i devlet-i aliyyeleridir ki] Sâhibe-i arzuhâl zâtı mu‘arrefe Emine Hatun bt. Abdullah bi’l-ma‘iyye rü’yete memûr nezâret-i hazret-i Sadâret-penâhîde âsûde evkāf müfettişi müderrisîn-i kirâm-ı zevi’l-ihtirâmdan fazîletlü Mehmed Said Efendi dâ‘îleri tarafından mürsel Kâtib Mehmed Nuri Efendi hâzır olduğu hâlde İstanbul mahkemesinde meclis-i şer‘-i enverde zikri âtî bir bâb menzilin sülüse-i erbâ‘ına bâ-temessük-ı mütevellî bi’l-icâreteyn mutasarrıflar olup ol vechile vaz‘-ı yedleri mütehakkık olan derûn-ı arzuhâlde isimleri mezkûr kendi nefsinden asıl ve zevcesi Hadice Hatun bt. Ali müseccel vekîli Berber es-Seyyid Ömer Ağa b. Mehmed muvâcehesinde nezâret-i hazret-i müşârun-ileyhde âsûde evkāfdan defterdâr-ı esbak Hüseyin Efendi nâm sâhibü’l-hayrın İstanbul’da Kaliçeci Hasan Câmi‘inde Şeyhülkurrâ ve mu‘allim-i sıbyân ta‘yîn eylediği vakfı müsakkafâtından zikr olunan Kaliçeci Hasan Mahallesi’nde vâki‘ ber-mûceb-i temessük-ı mütevellî ma‘lûmü’l-hudûd ve şehriye yirmi akçe icâre-i müecceleli bir bâb menzili bâ-re’y-i mütevellî müstakilleten bi’l-icâreteyn tasarrufumda iken bi-kazâillâhi te‘âlâ bundan akdem mahâll-i merkūmda vukū‘ bulan harîkde muhterik olup arsa sırfa kaldıkdan sonra ben zikr olunan menzil arsamı dört sehm i‘tibâriyle bir sehmini tasarrufumda ibkā ve iki sehmini mezbûr es-Seyyid Ömer Ağa’ya ve bir sehmini zevcesi müvekkile-i mezbûre Hadice Hatun’a bin iki yüz otuz dört senesi Zilka‘deti’ş-şerîfesinin yirmi beşinci günü bâ-re’y-i mütevellî ferağ ve tefvîz eder olduğumda zevcân-ı mezbûrandan her biri bana ölünceye değin bakmak şartıyla meccânen ferağ ve tefvîz onlar dahi şart-ı mezkûr ile tefevvüz ve kabûl ve mütevelliye-i vakf dahi ol vechile tasarruflarına ba‘de’l-izn mezbûr es-Seyyid Ömer Ağa kendi mâlıyla arsa-yı mezkûreye teberru‘an li’l-vakf müceddeden menzilimi binâ ve inşâ edüp lâkin şart-ı mezkûr ile olan ferağ-ı mezkûrum şer‘an sahîh ve mu‘teber olmamağla menzil-i mezkûrdan dört sehm i‘tibâriyle üç sehmini yine bâ-re’y-i mütevellî bi’l-asâle ve bi’l-vekâle geri bana ferağ etmek üzere mezbûr Berber es-Seyyid Ömer Ağa’ya tenbîh olunmak matlûbumdur deyü vakf-ı mezbûrun bi’l-meşrûtiye mütevelliyesi zâtı mu‘arrefe Zübeyde Hanım bt. Abdülvehhab hâzır olduğu hâlde mahallinde ta‘yîn dahi ettikden sonra ba‘de’d-da‘vâ ve’l-istintak asıl ve vekîl-i merkūm Berber es-Seyyid Ömer Ağa mütevelliye-i mezbûrenin tasdîkiyle cevâbında arsa-yı mezkûrenin i‘tibâr-ı mezkûr üzere iki sehmini bana ve bir sehmini zevcem müvekkile-i mezbûreye merkūme Emine Hatun zimmetinde kable’l-harîk menzil-i mezkûr ta‘mîrine bi-şartü’r-rücû‘ emriyle masrûfumdan yüz yetmiş beş guruş ve kezâlik emriyle icâre-i müctemi‘asından mütevelliye-i hâzıra-i mezbûreye medfû‘um olan kırk beş guruş ki cem‘an alacak hakkım olan iki yüz yirmi guruşa takāsen ferağ-ı sahîh-i kat‘î-i mu‘teber ile bâ-re’y-i mütevelliye-i mezbûre fâriğa olmuşdur deyü şart-ı mezkûr ile ferağ da‘vâsını ba‘de’l-inkâr müdde‘iye-i mezbûre Emine Hatun da‘vâ-yı mezkûresine ityân-ı beyyineden ızhâr-ı acz edüp asıl ve vekîl-i mezbûrândan her biri tahlîfe dahi tâlibe olmamağın mûcebiyle müdde‘iye-i mezbûre Emine Hatun da‘vâ-yı mezbûresiyle zevcân-ı mezbûran Berber es-Seyyid Ömer Ağa ve Hadice Hatun’dan her biri bilâ-beyyine-i âdile mu‘ârazadan [men‘] olunduğu huzûr-ı âlîlerine i‘lâm olundu. Fî 6 Ş sene 1237