İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 341 Hüküm no: 321 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Bedros’un, Seyyid Osman Ağa b. Abdurrahman Ağa’ya olan borcunu ödemesi gerektiği Üç buçuk tefene ipek semeniyle 70.850 guruş hüküm Ma‘rûz-ı dâ‘î [-i devlet-i aliyyeleridir ki] Sâbıkā dergâh-ı âlî -dâme mahfûfen bi’l-me‘âli-de yeniçeri ağası olup hâlâ mahrûse-i Bursa’da ikāmet[e] memûr olan derûn-ı arzuhâlde ismi mezkûr kırk üç es-Seyyid Osman Ağa b. Abdurrahman Ağa tarafından husûs-ı âtîde vekîl olduğu Mustafa Mesud Efendi b. Mehmed ve Mehmed Ağa b. Ali nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan İmâm İbrahim Efendi b. Mehmed nâm kimesne Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde sâhibey-i arzuhâlden Kirkor v. Bedros nâm zimmî muvâcehesinde müvekkilim mûmâ-ileyh sâbıkā yeniçeri ağası Kırküç es-Seyyid Osman Ağa işbu yedimde olan bin iki yüz otuz üç senesi Zilhicceti’ş-şerîfesinin on beşinci günü târihiyle müverrah bir kıt‘a temessük mantûkunca târih-i merkūmda mâlından mesfûr Kirkor zimmîye nakden iki bin guruş ikrâr ve teslîm ol dahi iktirâz ve kabz ve umûruna sarfla istihlâk edüp zahr-ı temessükde tahrîr olunduğu üzere meblağ-ı mezbûrun beş yüz guruşunu iki yüz otuz dört senesi Muharremi’l-harâmı gurresinde mesfûr Kirkor zimmî müvekkilim [mûmâ-]ileyhe edâ ve teslîm ol dahi ahz ü kabz ve istîfâ etmekle bâkī bin beş yüz guruş ile yine işbu yedimde olan iki yüz otuz dört senesi şehr-i Rebî‘ülâhirinin on beşinci günü târihiyle müverrah diğer bir kıt‘a temessük mantûkunca târih-i mezkûrda mâlından bir def‘a dahi mesfûr Kirkor zimmîye nakden altı bin guruş ikrâr ve teslîm ve mâlından her tefesi yüzer guruşa olmak üzere üç buçuk tefe ipeğini üç yüz elli guruşa mesfûr Kirkor zimmîye bey‘ ve teslîm eylediğinde ol dahi iktirâz ve kabz ve umûruna sarfla istihlâk ve iştirâ ve temellük ve tesellüm ve kabz ve kabûl edüp ol vechile müvekkilim mûmâ-ileyhin mesfûr Kirkor zimmî zimmetinde ciheteyn-i mezkûreteynden makbûzundan bâkī cem‘an yedi bin sekiz yüz elli guruş alacak hakkı olmağla meblağ-ı mecmû‘-ı mezkûru mesfûr Kirkor zimmîden müvekkilim mûmâ-ileyh içün bi’l-vekâle taleb ederim deyü ba‘de’d-da‘vâ ve’l-inkâr müdde‘î-i vekîl-i mezbûr İmâm İbrahim Efendi da‘vâ-yı mezkûrelerinden müvekkili ağa-yı mûmâ-ileyhin târih-i evvel-i mezkûrda mesfûr Kirkor zimmîye meblağ-ı merkūm iki bin guruş ikrâz ve teslîm ol dahi iktirâz ve kabz ve istihlâk eylediği müdde‘âsını lede’t-tezkiye makbûlü’ş-şehâde idükleri bi’l-ihbâr zâhir olan Hasan Ağa b. Hasan ve Uzunoğlu es-Seyyid Ahmed b. Halil nâm kimesneler şehâdetleriyle ve târih-i sâni-i merkūmda yine mesfûr Kirkor zimmîye bir def‘a dahi meblağ-ı merkūm altı bin guruşu ikrâz ve teslim ve mâlından zikr olunan üç buçuk tefe ipeğini üç yüz elli guruşa mesfûr Kirkor zimmîye bey‘ ve teslîm ol dahi iktirâz ve kabz ve istihlâk ve iştirâ ve temellük ve tesellüm ve kabz ve kabûl eylediği müdde‘âlarını lede’t-tezkiye kezâlik makbûlü’ş-şehâde idükleri bi’l-ihbâr zâhir olan el-Hâc Hüseyin Vehbi Ağa b. Mehmed ve Osman Ağa b. Ahmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince bi’l-vekâle müvekkil-i mûmâ-ileyhin kabzını mu‘terif olduğu meblağ-ı mezbûr beş yüz guruşdan mâ‘adâ vekîl-i merkūmun müdde‘âsı olan meblağ-ı mecmû‘-ı mezkûr yedi bin sekiz yüz elli guruşu müvekkil-i mûmâ-ileyh sâbıkā yeniçeri ağası Kırküç es-Seyyid Osman Ağa içün vekîl-i müdde‘î-i mezbûr İmâm İbrahim Efendi’ye edâ ve teslîme mesfûr Kirkor zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 8 N sene 1237