İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 340 Hüküm no: 320 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Usta b. Hüseyin ile Sandıkçı İbrahim Edhem Ağa b. Mustafa’nın nalbant dükkânı davasında sulh oldukları Na‘lband dükkânından ihrâc etmemeğe ve beher şehr kirâsını edâya ta‘ahhüd Ma‘rûz-ı dâ‘î [-i devlet-i aliyyeleridir ki] Derûn-ı arzuhâlde mezkûrü’l-ism na‘lband esnâfından Osman Usta b. Hüseyin meclis-i şer‘-i münîrde sâhib-i arzuhâl Sandıkçı İbrahim Edhem Ağa b. Mustafa nâm kimesne muvâcehesinde mahmiye-i İstanbul’da Yedikule kapısı hâricinde vâki‘ ma‘lûmü’l-hudûd vakıf ve dört bâb oda ve müştemilât-ı sâireyi hâvî bir bâb han ve tahtında kâin bir bâb na‘lband dükkânı mezbûr İbrahim Edhem Ağa’nın bâ-temessük-ı mütevellî bi’l-icâreteyn tasarrufunda ve zikr olunan han ve müştemilât-ı ma‘lûmesi ve na‘lband dükkânında şehriye on ikişer guruş kirâ ile ben müstecir olup derûnunda mevcûde şürût-ı nizâmda dâhil beyne’l-esnâf na‘lband gediği tâ‘bir olunur âlât-ı lâzıme-i ma‘lûme dahi yedimde mülk-i müşterâm ve ol vechile derûnlarında sâkin iken zikr olunan han ve na‘lband dükkânı bundan akdem harâb oldukda ta‘mîrlerine masrûfu mezbûrun bi-şartü’r-rücû‘ emriyle mâlımdan beş yüz elli guruş sarf etmemle masrûfum olan meblağ-ı mezbûr beş yüz elli guruşu mezbûr İbrahim Edhem Ağa’dan taleb ederim deyü tasaddî eylediğim da‘vâmdan bâ-vesâtet-i muslihîn rızâmla meccânen fâriğ olmamla husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyyeye müte‘allika her birimiz âhar ile kat‘â da‘vâ ve nizâ‘ ve husûmetimiz kalmamak manasına âmme-i de‘âvî ve mutâlebât ve kâffe-i eymân ve muhâsemâtdan şürût-ı müfsideden ârî ibrâ-i âmm-ı sahîh-i şer‘î ile her birimiz âharın zimmetini kabûlü hâvî ibrâ ve iskāt ettikden sonra mezbûr İbrahim Edhem Ağa zikr olunan bir bâb han ve müştemilât-ı ma‘lûmesini ve na‘lband dükkânını yedimden ba‘de’l-kabz işbu târih-i i‘lâmdan beher şehr sâbıkı vechile yine on ikişer guruşa bana îcâr ve teslîm ben dahi yedinden istîcâr ve tesellüm ve kabz ve kabûl [65b] ve zikr olunan on ikişer guruşu beher şehr bilâ-cevr kendüye edâya ve fîmâ ba‘d han-ı merkūm ile müştemilât-ı sâiresini ve na‘lband dükkânını ta‘mîr iktizâ ederse mutasarrıfı mezbûr İbrahim Edhem Ağa’ya ihbâr ve ifâde etmek üzere ta‘ahhüd eylediğimde ol dahi ba‘de’l-yevm iktizâ eden ta‘mîrini kendi edüp şürût-ı nizâmımız üzere şehriye kirâsını ahz ile beni ihrâca tasaddî etmemeğe ve her birimiz âharın ta‘ahhüdünü dahi kabûl-birle külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî 25 Ş sene 1237