İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 342 Hüküm no: 323 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Süleyman Ağa’nın yerine Ali Ağa b. Hasan’ın dikici esnafı kethüdalığına tayini Dikici esnâfına kethüdâ nasbı Ma‘rûz[-ı dâ‘î-i devlet-i aliyyeleridir ki] Hâssa Çizmecibaşı el-Hâc İbrahim Efendi ve Çizmeciler kethüdâsı İsmail Ağa ve mesciler yiğitbaşısı Mehmed Ağa ve tâcirler kethüdâsı diğer İsmail Ağa ve tâcirler Yiğitbaşısı es-Seyyid Mehmed Ârif ve bâzergânbaşı es-Seyyid Osman Ağa ve büyük arasta haffâflar kethüdâsı Hasan Ağa ve yiğitbaşı Mehmed Esad Efendi ve Karaman arastası haffâflar kethüdâsı el-Hâc Hâfız Mustafa Ağa ve Âsitâne-i sa‘âdet-âşiyâna ve bilâd-ı selâse ve tevâbi‘lerinde kâin dikici esnâfından pabucçular kethüdâsı Süleyman Ağa ve çizmeci ustalarından el-Hâc Mehmed Ağa ve Abdurrahman Ağa ve es-Seyyid Ömer Ağa ve diğer el-Hâc Mehmed Ağa ve el-Hâc Salih Ağa ve Ahmed Ağa ve İbrahim Ağa ve Osman Ağa ve Mustafa Usta ve Yusuf Alemdâr ve diğer Mustafa Usta ve Hasan Usta ve Cedikçi İbiş Ağa ve Mestçi ustalarından Mehmed Ağa ve Mehmed Odabaşı ve es-Seyyid Mehmed Ağa ve Abdullah Ağa ve Ahmed Ağa ve sâir Müslimîn ve yine dikici ustalarından ve re‘âyâdan Şâhzâde köşe ustası Avakim ve Mercan Hanı köşe ustası Bedros ve Sultan Odaları köşe ustası Artin ve Ali Paşa Hanı köşe ustası Melkon ve Emirhanı köşe ustası Agob ve Çatal Han köşe ustası diğer Agob ve Kürkçü Hanı köşe ustası Avanes ve Vezîr [Hanı] köşe ustası Mesiyya [66a] ve Sarrac Hanı köşe ustası Begos ve Takyeci Hanı köşe ustaları Mıgırdıç ve Serope ve Dülbentçi Mahallesi köşe ustası diğer Avanes ve Samatya köşe ustası Manok ve Lanka köşe ustası Karabet ve Davudpaşa köşe ustası diğer Mıgırdıç ve Karaman köşe ustası Mıdık ve tahta minâre köşe ustası âhar Avanes ve Topkapu köşe ustası âhar Mıgırdıç ve Karagümrük köşe ustası diğer Mıgırdıç nâm zimmîler ile sâir dört yüz neferden mütecâviz Müslim ve re‘âyâ haffâf ve dikici esnâfı Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i münîrde hâlâ esnâf-ı mezkûre üzerine dikicibaşı olan Çolak Süleyman Ağa nâm kimesne muvâcehesinde mezbûr Süleyman Ağa bir müddetden berü dikicibaşımız olup lâkin kendi hâlinde olmayup hilâf-ı şer‘-i şerîf ve mugāyir-i nizâm-ı hareket eylediğinden umûr-ı esnâfın ihtilâline bâ‘is olmağla mezbûr dikicibaşılıkdan azl olunup yerine esnâfımızdan mu‘temed kimesne dikicibaşı nasb ve ta‘yîn olunmak cümlemizin matlûbumuzdur deyü bi’l-muvâcehe teşekkî ve sû-i hâlini ihbâr ile azlini iltimâs eylediklerinde mezbûr Süleyman Ağa dahi dikicibaşılıkdan keff-i yed edüp azl olunduktan sonra tekrar bi’l-cümle esnâf-ı merkūmûn du‘âhânemizde ma‘kūd meclis-i şer‘-i enverde çizmeci esnâfından Ali Ağa b. Hasan nâm kimesne hâzır olduğu hâlde mukaddemâ dikicibaşımız olan mezbûr Süleyman Ağa bâlâda tahrîr olunduğu üzere azl olunmağla yerine örf ve âdetimize vâkıf ve nizâmımızı ârif ve cümlemizin marzî ve muhtârımız olan mezbûr Ali Ağa esnâfımızın üzerine dikicibaşı nasb olunmak matlûbumuzdur dediklerinde ber-vech-i muharrer iltimâslarıyla hâzır-ı mezbûr Çizmeci Ali Ağa esnâf-ı mezkûre üzerine dikicibaşı nasb ve ta‘yîn ve hilâf-ı şer‘-i şerîf ve mugāyir-i nizâm-ı esnâf hareket etmeyüp her hâlde nizâm-ı esnâfı muhâfazaya sa‘y etmek üzere tenbîh olundukta ol dahi kabûl ve ber-minvâl-i meşrûh harekete ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî 18 Ş sene 1237