İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 343 Hüküm no: 324 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Hasan’ın yorgancı esnaflığından çıkarıldığı Yorgancı esnâfından ihrâc Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin yorgancı esnâfının kethüdâları Ahmed Ağa ve yiğitbaşıları Mustafa Efendi ve esnâfından el-Hâc Osman Ağa ve el-Hâc Halil Ağa ve el-Hâc Abdi Ağa ve Eyyübî İsmail Ağa ve Ahmed Ağa ve Hüseyin Ağa ve Mehmed Emin Ağa ve İbrahim Edhem Ağa ve diğer Ahmed Ağa ve hallaçlar kethüdâsı Osman Ağa ve sâirleri meclis-i şer‘-i münîrde esnâf-ı merkūmeden el-Hâc Halil Ağa b. Hasan muvâcehesinde mezbûr el-Hâc Halil Ağa esnâfımızdan olup lâkin ırz ve edebiyle mukayyed olmayup dâimâ nizâmımıza mugāyir hareket ve her birimize cürûb ve şütûm ile mu‘âmeleye cesâret-birle ihtilâl-i nizâmımızı mûcib hareketde olup bundan akdem bi’d-defa‘ât kendüye nush ve pend ile tenbîh eylediğimizde ısgā etmeyüp ef‘âl-i sâbıkāsında ısrârla cümlemize rencîde etmekle mezbûr el-Hâc Halil’den cümlemizin emniyetimiz meslûb olmuşdur deyü bi’l-muvâcehe teşekkî ve esnâf-ı merkūmeden hurûcunu iltimâs eylediklerinde ol dahi muhâlefet etmeyüp hurûcuna ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî 6 L sene 1237