İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 353 Hüküm no: 335 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halebli Anton Celitir ile Halebli Hana v. Haçok’un alacak davsında sulh oldukları İki bin guruş üzerine sulh mâ‘adâsı olan 8.000 guruş ibrâ Ma‘rûz-ı dâ‘î [-i devlet-i aliyyeleridir ki] İşbu arzuhâl hâmişinde muharrer bin iki yüz otuz üç senesi Şa‘bâni’l-mu‘azzamının yirmi ikinci günü târihiyle müverrah ve ol târihde Rumeli kazaskeri olan merhûm Ahmed Kâmilî Efendi’nin hatmiyle mahtûm bir kıt‘a i‘lâm-ı şer‘î derûnunda mastûrü’l-ism olup bundan akdem hâlik olan Sarraf Diyârbekirlı Mıgırdıç v. Manok zimmînin verâseti zevcesi Penbe bt. Atam Nasrâniye ile sulbî sagīr oğlu İstefan ve kebîr oğlu Oseb zimmîye münhasıra ba‘dehû zevce-i mersûme Penbe Nasrâniye dahi hâlike olmağla verâseti sadri oğulları sagīr-i mersûm İstefan ile mersûm Oseb zimmîye ba‘de’l-inhisâr hâlâ mesfûr Oseb zimmî asâleten ve sagīr-i mersûm İstefan zimmî dahi âkil ve bâliğ ve hâlâ kebîr olup yedinde olan bin iki yüz otuz dört senesi şehr-i Ramazani’l-mübâreğinin yirminci günü târihiyle muvarraha ve ol târihde mahrûse-i Galata kādısı fazîletlü Benlizâde Mehmed Sâbit Efendi’nin imzâ ve hatmini hâviye bir kıt‘a hüccet-i şer‘iyye nâtıka olduğu üzere isbât-ı rüşd eylediği bi’t-tasâduk zâhir oldukdan sonra kezâlik asâleten İstanbul mahkemesinde meclis-i şer‘-i enverde derûn-ı i‘lâm-ı mezkûrda mersûmü’l-ism Halebli Anton Celitir v. Hanna v. Atam nâm zimmî tarafından husûs-ı âtîde tasdîke vekîli olduğu Petrak v. Yoseb Mardiros ve Bedros v. Nasri nâm zimmîler şehâdetleriyle ber-nehc-i şer‘î sâbit olan Halebli Hanna v. Haçok nâm zimmî muvâcehesinde mûrisimiz babamız hâlik-i evvel-i mersûm Mıgırdıç zimmînin müvekkil-i mersûm Halebli Anton Celitir zimmî zimmetinde cihet-i karz-ı şer‘îden alacak hakkı olup kable’l-ahz hâlik oldukda bize mevrûs mârru’z--zikr i‘lâm-ı şer‘î mantûkunca mahkûmun-bih hakkımız olan on bin guruşdan müvekkil-i mesfûr Anton Celitir zimmî ile bâ-vesâtet-i muslihîn yedinden ahz ü kabz eylediğimiz iki bin guruş üzerine ba‘de akdi’l-musâlaha ve’l-kabûl mâ‘adâsı olan sekiz bin guruşa ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsemâtdan şürût-ı müfsideden ârî ibrâ-i âmm-ı sahîh-i şer‘î ile her birimiz âharın zimmetini kabûlü hâvî bi’l-verâse ve bi’l-asâle ibrâ ve iskāt etmemizle fîmâ ba‘d her birimiz âhar zimmetinde hukūk-ı şer‘iyyeden bir akçe ve bir habbe ve bir nesne hakkı kalmayup eğer mûrisimiz hâlik-i evvel-i mersûm ile hâlike-i sâniye-i mersûmeye vâris-i âhar olmak üzere kimesne zuhûruyla sulh-i mezkûru mücîz olmayup mebağ-ı merkūm içün müvekkil-i mesfûr Halebli Anton Celitir zimmîden hükm-i hâkimi’ş-şer‘le [68b] nesne ahz ederse mikdâr-ı me’hûzunun nısfına kabûlü hâvî biz bi’l-verâse ma‘an kefîl bi’l-mâl ve dâminleriz deyü her birinin bi’l-verâse ikrâr u i‘tirâflarını vekîl-i mesfûr Halebli Hanna zimmî bi’l-vekâle tasdîk eylediği mahkeme-i merkūmeden huzûr [-ı âlîlerine i‘lâm olundu.] Fî 12 L sene [12]37