İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 354 Hüküm no: 336 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nomi v. Mike ile Nemçeli Salom v. Menaş’ın şal semeninden birbirlerinin zimmetlerini ibrâ ettikleri Yof tâ‘bir olunur çuka semeninden ve şal semeninden birbirlerine ibrâ Ma‘rûz-ı dâ‘î [-i devlet-i aliyyeleridir ki] Sâhib-i arzuhâl hazırcı çukacı Nomi v. Mike nâm zimmî İstanbul mahkemesinde meclis-i şer‘-i hatîrde derûn-ı arzuhâlde mastûrü’l-ism Nemçeli Salom v. Menaş nâm Yahûdi muvâcehesinde tercümânı Eklesli tarafından Kapıoğlanı Rafail hâzır olduğu hâlde işbu târih-i i‘lâm senesi duhûl eden Martın ibtidasından İstanbul’da bodrum hanında vâki‘ odamda mâlımdan altmış beş zirâ‘ yof tâ‘bir olunur bârûti çukamı bir zirâ‘ını yirmi beş guruşdan cem‘an bin üç yüz guruşa mesfûr Salom Yahûdi’ye bey‘ ve teslîm ol dahi yedimden iştirâ ve kabz edüp ol vechile meblağ-ı mezkûr bin üç yüz guruş mesfûr Salom Yahûdi zimmetinde alacak hakkım olmağla meblağ-ı mezbûru mesfûr Salom Yahûdi’den taleb ederim deyü da‘vâ eylediğimde mesfûr Salom Yahûdi dahi cevâbında külliyen inkârından mâ‘adâ benim dahi târih-i İseviyenin bin sekiz yüz on iki senesi Haziranının on birinci günü ile müverrah Rûmiyyü’l-imlâ yedimde olan bir kıt‘a temessük mantûkunca cihet-i karz-ı şer‘îden beş yüz guruş ve hâric ez temessük yine cihet-i karzdan yedi yüz yedi guruş on para ve mâlımdan bey‘ ve teslîm eylediğim bir aded şal semeninden dört yüz yetmiş altı buçuk guruş ki cem‘an senin zimmetinde bin altı yüz seksen üç buçuk guruş on para alacak hakkım olmağla taleb ederim deyü benden eylediği da‘vâsından ben ancak temessük-ı merkūm ile karzdan zimmetimde müdde‘î-i mesfûra meblağ-ı mezbûr beş yüz guruş deynim olduğunu ikrâr ve ziyâde bin yüz seksen üç buçuk guruş on para müdde‘âsını külliyen inkâr eylediğimde her birimiz âharın münkir olduğu müdde‘âsını isbât sûretinde iken ben zikr olunan bin üç yüz guruş müdde‘âmdan bâ-vesâtet-i muslihîn mesfûr Salom Yahûdi ile an inkâr beş yüz guruş üzerine ba‘de akdi’l-musâlaha ve’l-kabûl bedel-i sulh-i merkūm beş yüz guruşu mesfûr Salom Yahûdi ber-vech-i muharrer zimmetinde alacak hakkı olup ikrâr eylediğim meblağ-ı mezbûr beş yüz guruşa takās ve mahsûb eylediğinde ve dahi mukāssa ve kabûl edüp ba‘de’l-yevm ziyâde müdde‘âm olan sekiz yüz guruşa ve işbu târih-i i‘lâma gelince sâir cemî‘ hukūk-ı şer‘iyyeye müte‘allika mutlaka âmme-i de‘âvî ve kâffe-i eymân ve muhâsamâtdan şürût-ı müfsideden ârî ibrâ-i âmm-ı sahîh-i şer‘î ile mesfûr Salom Yahûdi’nin zimmetini ibrâ ve iskāt eylediğimde ol dahi benden ziyâde müdde‘âsı olan karz ve şal semeninden cem‘an meblağ-ı mezbûr bin yüz seksen üç buçuk guruş ve on paraya ve kezâlik işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i eymân ve muhâsamâtdan şürût-ı müfsideden ârî ibrâ-i âmm-ı sahîh-i şer‘î ile benim zimmetimi ibrâ ve iskāt ve her birimiz ber-minvâl-i muharrer âharın ibrâsını kabûl ve bu vechile külliyen kat‘-ı nizâ‘ ve ref‘-i husûmet eyledik deyü ikrâr ve tasdîkleri tescîl ve mahkeme-i merkūmeden huzûr [-ı âlîlerine i‘lâm olundu.] Fî 13 L sene [12]37