İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 355 Hüküm no: 337 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah Efendi b. Mustafa ile Şerîfe Hasene Hanım’ın çiftlik eşyası davasında birbirlerinin zimmetlerini ibrâ ettikleri Selânik’de Topçular demekle meşhûr çiftlik eşyasından 27.500 guruş ibrâsı Ma‘rûz[-ı dâ‘î-i devlet-i aliyyeleridir ki] Bâ-işâret-i aliyye hazret-i Şeyhülislâmî sâdır olan fermân-ı âlişâna imtisâlen bâ-pâye-i İstanbul sâbıkā Edirne kādısı olup bundan akdem irtihâl-i dâr-ı bekā eden es-Seyyid Süleyman Beyefendi’nin sulbiye-i kerîme-i muhteremeleri ve hasran vâriseleri sâhibe-i arzuhâl Şerîfe Hasene Hanım tarafından zikri âtî meblağı taleb ve da‘vâ ve sulh ve ibrâya ve bedel-i sulhü ahz ü kabz ve kendüye teslîme vekîl-i müseccel-i şer‘îsi Hamdullah Efendi b. Ahmed nâm kimesne meclis-i şer‘-i münîrde mevâlî-i izâmdan sâbıkā Yenişehr-i Fener kādısı olup hâlâ mahrûse-i Selânik’de me’zûnen bi’l-iftâ olan derûn-ı arzuhâlde mastûrü’l-ism fazîletlü es-Seyyid Abdullah Efendi b. el-Merhûm Mustafa Efendi tarafından kezâlik ber-vech-i âtî da‘vâ ve husûmete ve lede’l-iktizâ sulh ve ibrâya vekîl olduğu mahrûse-i mezbûre ahâlîsinden bu esnâda Âsitâne-i aliyyeye gelen Ali Molla b. Mehmed ve İbrahim b. Hasan nâm kimesneler şehâdetleriyle mahzar-ı hasm-ı câhid-i şer‘îde ber-nehc-i şer‘î sâbit ve sübût-ı vekâletine hükm-i şer‘î lâhık olan Hasan Efendi b. Abdülkerim Efendi nâm kimesne mahzarında müvekkilem mûmâ-ileyhimânın pederi merhûm-ı mûmâ-ileyh Süleyman Beyefendi hayâtında ba-hüccet-i şer‘iyye otuz beş bin guruş iştirâ ve tefevvüz edüp ba‘dehû birkaç sene müddetde senevî dokuzar ve onar kîse akçeye âhara îcâr eylediği mahrûse-i Selânik kazâsında vâki‘ Topçular çiftliği demekle meşhûr mâlik ve mutasarrıf olduğu ma‘lûmü’l-hudûd bir kıt‘a çiftliğini bin iki yüz yirmi iki ve yirmi üç ve yirmi dört senelerinde idâresi husûsunu emâneten müvekkil-i mûmâ-ileyh Seyyid Abdullah Efendi’ye ihâle ve hâsılâtını kabza tarafından tevkîl eylediğinde müvekkil-i mûmâ-ileyh dahi vekâlet-i mezkûreyi kabûl ve üç sene müddetde mütevâliyeten çiftlik-i mezkûru zabt ve idâre ve hâsıl olan hubûbâtından me’kûlât ve ber-mu‘tâd mahall-i ma‘lûmelere verdikleri ihrâc olunduktan sonra âhara bey‘ eyledikleri fazla hubûbât ve fuzû‘ât esmânıyla koru ve mer‘a ve yaylak ve kışlak icâratından müvekkil-i efendi-i mûmâ-ileyhin yirmi iki senesinde makbûzu olan üç bin yedi yüz on bir guruş otuz yedi para ve yirmi üç senesinde makbûzu olan altı bin dokuz yüz yetmiş guruş altı para ve yirmi dört senesinde makbûzu olan bin yirmi beş guruş otuz para ki cem‘an sinîn-i mezkûrede makbûzu olan on bir bin yedi yüz sekiz guruş otuz üç paranın dört bin dokuz yüz yirmi bir guruş bir parasını merhûm-ı mûmâ-ileyhin hayâtında icâretiyle çiftlik-i mezkûr levâzımâtına sarf edüp bâkīsi olan altı bin yedi yüz seksen yedi guruş otuz iki paranın dahi altı yüz yetmiş bir guruş on altı parasını merhûm-ı mûmâ-ileyhe hayâtında irsâl ve teslîm ol dahi kabz edüp ve mâ‘adâ altı bin yüz on altı [69a] guruş on altı parayı kendi umûruna sarfla istihlâk etmekle meblağ-ı mezkûr altı bin yüz on altı guruş on altı parayı kable’l-ahz ve’l-istîfâ mûmâ-ileyh es-Seyyid Süleyman Beyefendi fevt ve meblağ-ı bâkī-i mezkûr kerîmesi müvekkile-i mûmâ-ileyhâya mevrûs olmağla meblağ-ı bâkī-i mezkûr altı bin yüz on altı guruş on altı parayı müvekkil-i efendi-i mûmâ-ileyhe izâfetle vekîl-i mezbûrdan müvekkile-i mûmâ-ileyha içün bi’l-vekâle taleb ederim deyü da‘vâ eylediğimde ol dahi cevâbında müvekkilim efendi-i mûmâ-ileyh meblağ-ı bâkī-i mezkûru dahi ber-mûceb-i defter-i müfredât gerek çiftlik-i mezkûrun iktizâ eden levâzımına sarf ve gerek karz-ı çift tâ‘bir olunur ba‘zı re‘âyâya ikrâz etmişdi deyip ol vechile beynimizde ba‘de vukū‘ı’l-münâza‘a muslihûn tavassutuyla beynimiz tevfîk olunup vekîl-i mezbûr Hasan Efendi müvekkili mûmâ-ileyh es-Seyyid Abdullah Efendi’nin mâlından olarak bi-tarîkı’s-sulh işbu meclis-i şer‘de iki bin yedi yüz elli guruş müvekkilem mûmâ-ileyha Şerîfe Hasene Hanım içün bana def‘ ve teslîm ben dahi yedinden bi’l-vekâle ahz ü kabz ve müvekkilem mûmâ-ileyhânın umûruna sarfla istihlâk edüp ziyâdesi olan üç bin üç yüz altmış altı guruş on altı para mutâlebesine ve bi’l-cümle zikr olunan husûslara ve meblağ-ı müstehlek-i merkūma ve işbu târih-i i‘lâma gelince sâir beynimizde cereyân eden cemî‘ hukūk-ı şer‘iyyeye müte‘allika âmme-i de‘âvî ve mutâlebâtdan tarafeynden her birimiz müvekkilân-ı mûmâ-ileyhimâya izâfetle âharın zimmetini ibrâ-i âmm-ı sahîh-i şer‘î ile bi’l-vekâle ibrâ ve iskât her birimiz ber-vech-i muharrer müvekkilân-ı mûmâ-ileyhimâya izâfetle âharın ibrâsını kabûl eyledik deyü mukırr-ı vekîl-i mezbûr Hamdullah Efendi’nin bi’l-cümle takrîr-i meşrûhunu vekîl-i merkūm Hasan Efendi bi’l-vekâle tasdîk ve ber-vech-i meşrûh kabûlü hâvî ibrâ eylediğini tâyi‘an ve kat‘iyyen ikrâr u i‘tirâf edüp bu vechile külliyen kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 8 L sene 1237