İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 357 Hüküm no: 339 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akdağ kazasının Akviran köyündeki Kılıç Abdal Zâviyesi zaviyedarlığının Ebûbekir’e tevcihi Akviran karyesinde muktezî i‘lâmı Ma‘rûz[-ı dâ‘î-i devlet-i aliyyeleridir ki] İşbu arzuhâl ve derkenârlara nazar olundukta Akdağ’a tâbi‘ Akviran karyesinde vâki‘ Kılıç Abdal Zâviyesi vakfının vazîfe-i mu‘ayyene ile zâviyedârlığına evlâd-ı vakıfdan Osman Halîfe mutasarrıf iken fevt oldu deyü bin iki yüz otuz altı senesi Şevvâlinin on üçüncü günü bâ-arzuhâl evlâd-ı vâkıfdan olup nevbet-i tasarruf kendinin ise şartıyla bilâ-veled mahlûlünden es-Seyyid eş-Şeyh Mehmed Halîfe an-evlâd-ı vâkıfa tevcîh olunup berât-ı âlîşân verilmiş idüğü derkenârdan müstebân olup lâkin merkūm Osman Halîfe işbu bin iki yüz otuz yedi senesi Ramazani’l-mübârekinin yedinci günü fevt olup sulbî kebîr oğulları sâhib-i arzuhâl Ebûbekir ve Ali el-yevm mevcûdlar iken sene-i sâbıkāda hilâf-ı inhâya mebnî bilâ-veled mahlûlünden merkūm es-Seyyid eş-Şeyh Mehmed Halîfe’ye zâviye-i merkūme tevcîh olundukta merkūm Osman Halîfe hayâtında olup fevt olmuş dahi olsa mezbûrân Ebûbekir ve Ali sulbî oğulları ve hâlâ mevcûdlar idüğünü vilâyetlüsinden es-Seyyid Mehmed Fazıl Efendi b. Ebûbekir ve Mehmed Ağa b. Mustafa nâm mevsûku’l-kelîm kimesneler ile sâir mazbûtü’l-esâmî Müslimîn meclis-i şer‘de alâ-tarîkı’ş-şehâde haber vermeleriyle alâ-mûceb-i ihbârihim muktezî derkenârında zikr olunduğu üzere bu makūle zâviyedârlık evlâda verilegelen cihâtdan olup mezbûr es-Seyyid eş-Şeyh Mehmed Halîfe mukaddem târih ile hilâf-ı inhâya mebnî bilâ-veled mahlûlünden kendüye tevcîh ettirmiş ise de zâviye-i merkūme müteveffâ-i mezbûrun mahlûlünden ve hilâf-ı inhâ ile mukaddemâ üzerine tevcîh ettiren merkūm es-Seyyid eş-Şeyh Mehmed’in def‘inden oğulları sâhib-i arzuhâl Ebûbekir ve Ali’ye iştirâken tevcîhi iktizâ ettikden sonra mezbûr Ali zâviyedârlık-ı mezbûrun nısfından rızâsıyla meclis-i şer‘de keff-i yed ve müstakillen karındaşı mezbûr Ebûbekir’e tevcîhini istid‘â etmeğin bu sûretle zâviyedârlık-ı merkūm müteveffâ-i mezbûr Osman Halîfe’nin mahlûlünden ve mukaddemâ hilâf-ı inhâ ile üzerine tevcîh ettiren mezbûr es-Seyyid eş-Şeyh Mehmed Halîfe’nin ref‘inden ve mezbûr Ali’nin ber-vech-i muharrer keff-i yedinden müteveffâ-i mezbûrun âhar oğlu sâhib-i arzuhâl merkūm Ebûbekir’e müstakillen tevcîh ve yedine berât-ı şerîf-i âlîşân sadaka ve ihsân buyrulmak bâbında fermân-ı âlîleri sudûru re’y-i sâmîlerine menût idüğü imtisâlen li’l-emri’l-âlî İstanbul Mahkemesi’nden huzûr-ı âlîlerine i‘lâm olundu. Fî 17 L sene 1237