İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 358 Hüküm no: 340 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Ağa b. Abdullah’ın, mâlik olduğu canbaz ahırını eşi Hâce Nimetullah Hatun’a sattığı Canbâz ahırı başmuhâsebeye kayd Ma‘rûz[-ı dâ‘î-i devlet-i aliyyeleridir ki] Ayasofya-i kebîr evkāfından mahmiye-i İstanbul’da Atpazarı’nda Yukarıpazar nâm mahalde keçeciler civârında vâki‘ Abdüllatif ve el-Hâc Yusuf ahırları beynlerinde kâin bir bâb Canbâz ahırı derûnunda mevcûde başmuhâsebe kaleminde mukayyed beyne’l-esnâf gedik tâ‘bir olunur on yular ve on takım köstek ve pâyend ve iki satl ve iki kaşağı ve on başlık ve on çul ve yirmi kebe belelme ve sâir âlât-ı lâzıme-i ma‘lûmeye bir kıt‘a sûret mantûkunca mâlik olan el-Hâc Selim Ağa b. Abdullah nâm kimesne bundan [akdem] vefât etmekle min-ciheti’l-velâ kendiyi i‘tâk eden hasran vârisi Şavşatlızâde es-Seyyid Mehmed Salih b. Hüseyin bi’l-verâse [69b] meclis-i şer‘-i münîrde hâlâ zevcesi Hâce Nimetullah Hatun bt. el-Hâc İbrahim tarafından husûs-ı âtîde tasdîka vekîl-i şer‘îsi es-Seyyid el-Hâc İbrahim Edhem Ağa b. el-Hâc Eyüb muvâcehesinde zikr olunan Canbâz ahırı derûnunda bâlâda mezkûr gedik tâ‘bir olunan âlât-ı lâzıme-i ma‘lûme ber-vech-i muharrer min-ciheti’l-velâ hasran vârisi olduğum müteveffâ-i mezbûrun ile’l-vefât yedinde mâlı ve mülkü olup ba‘de vefâtihi hasren bana mevrûs olmağla ol vechile akd-i âti’z-zikrin sudûruna değin yedimde mâl-ı mevrûsum olan gedik tâ‘bir olunur âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin iki bin beş yüz guruşa zevcem müvekkile-i mezbûre Hâce Nimetullah Hatun’a bi’l-verâse bey‘ ve temlîk ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edüp semeni olan meblağ-ı merkūm iki bin beş yüz guruş mutâlebesine müte‘allika âmme-i de‘âvî ve mutâlebâtdan zevcem müvekkile-i mezbûre Hâce Nimetullah Hatun’un zimmetini kabûlü hâvî ibrâ-i âmm-ı sahîh-i şer‘î ile bi’l-verâse ibrâ ve iskāt etmemle fîmâ ba‘d mârrü’l-beyân Canbaz ahırı derûnunda mevcûde gedik tâ‘bir olunan âlât-ı lâzıme-i merkūmede benim kat‘â alâka ve medhalim kalmayup zevcem müvekkile-i mezbûre Hâce Nimetullah Hatun’un emvâl-i müşterâtı ve hakk-ı sırfı olmuşdur deyü ba‘de’l-ikrâr ve’t-tasdîk zikr olunan gedik âlâtının müteveffâ-i mezbûr el-Hâc Selim Ağa üzerinde olan kaydı ref‘ ve terkīn ve müşteriye-i müvekkile-i mezbûre Hâce Nimetullah Hatun ismine tasrîhan kayd ve atîk sûreti battalda hıfz ile yedine bir kıt‘a sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 19 L sene 1237