İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 362 Hüküm no: 345 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed b. İbrahim’in çarşı ve pazarda fırancıla satışına Arnavud Hamza b. Receb’in engel olmaması gerektiği Fırancala küfeciler tablakârı Ma‘rûz[-ı dâ‘î-i devlet-i aliyyeleridir ki] Arzuhâl eden fırancılacı küfecisi es-Seyyid Ahmed b. İbrahim nâm kimesne meclis-i şer‘-i münîrde mahmiye-i İstanbul’da Küçükkaraman’da vâki‘ ekmekçi fırını tablakârlarından mahmiye-i mezbûrede Sultan Mehmed Hân -aleyhi’r-rahmetü ve’l-gufrân- Câmi‘-i şerîfi havlusunun çörekçi kapısı dâhilinde beyne’l-esnâf mu‘teber kadîm gedik olarak bir kıt‘a tablasında fırın-ı mezkûrda tabh ve i‘mâl olunan nân-ı azîz bey‘ eden derûn-ı arzuhâlde mezkûrü’l-ism Arnavud Hamza b. Receb nâm kimesne muvâcehesinde habbâzân esnâfının kethüdâsı Mehmed Efendi b. Ali ve Müslim [70b] ve re‘âyâ bi’l-cümle mazbûtü’l-esâmî nizâm ustaları hâzır oldukları hâlde ben mahmiye-i mezbûrede Sarıgez’de vâki‘ fırancılacı fırını[ndan] fırancıla kaldırıp esvâk ve pazarda ibâdullâha bey‘le te‘ayyüş edüp lâkin esvâk ve Pazar köşelerinde küfe ve tabla vaz‘ıyla gedik olarak bir mahalde devam üzere fırancıla bey‘ etmeğe yedimde sened ve iznim yoğiken mezbûr Hamza’nın zikr olunan gedikli tablasının yanına küfe vaz‘ıyla devam üzere fırancıla bey‘ etmek üzere iken mezbûr Hamza zikr olunan tabla yanında fırancıla bey‘ime mümâna‘at etmekle suâl olunup mümâna‘atı men‘ olunmak matlûbumdur dedikde mezbûr Hamza dahi cevâbında kaziyye minvâl-i muharrer üzere olduğunu ba‘de’t-tasdîk Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle habbâz fırınları ve değirmen gedikleri mu‘teber ve fırınlarına merbût tabla ve peşgûn ve iskemleleri gedikleri kezâlik mu‘teber ve mâl-ı mîrî ve mâl-ı tüccâr mukābili olup bu makūle bir mahalde mu‘teber tabla ve iskemle gediği olmayan fırancılacı küfecileri ve tablakârları gedikli habbâz tablası ve iskemlesi yanında devam üzere fırancıla tabla ve küfesini vaz‘la fırancıla bey‘i esnâf-ı merkūmenin nizâm-ı kadîmine mugāyir idüğünü bi’l-muvâcehe esnâf-ı merkūme haber verdiklerinde mezbûrun yedinde senedi olmadığı hâlde dâhil-i nizâm olan habbâz tablası ve iskemlesi yanında devam üzere küfe vaz‘ etmeyüp esvâk [ve] pazardan gezdirip habbâz tablası ve iskemlesi olmayan eylediği mahallerde küfe vaz‘ıyla bey‘ etmek muktezâ-yı nizâmlarından idüğü mezbûr ise cümle tefhîm ve fîmâ ba‘d mugāyir-i nizâm-ı hareket etmemek üzere tenbîh olunduğu İstanbul Mahkemesi’nden huzûr [-ı âlîlerine i‘lâm olundu.] Fî 22 L sene 1237