İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 363 Hüküm no: 346 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balatkapısı’nda İsak Yahûdi ismine kayıtlı olan çörekçi gediğinin Menteş v. Avram üzerine kaydedilmesi Balatkapısı’nda Yahûdi çörekçi gediği sûret i‘tâsı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede kâin Yahûdi çörekçi esnâfından Menteş v. Avram nâm Yahûdi meclis-i şer‘-i münîrde mahmiye-i mezbûrede Balat kapısı hâricinde Hisardibi’nde vâki‘ ma‘lûmü’l-hudûd bir bâb Yahûdi çörekçi fırını derûnunda mevcûde ve başmuhâsebe kaleminde İsak Yahûdi ismine mukayyed beyne’l-hiref gedik tâ‘bir olunur çörekçi âlât-ı lâzıme-i ma‘lûmesinde kaydı mûcebince mâlik olan mesfûr İsak v. Yasef nâm Yahûdi bundan akdem hâlik oldukda yedinde mülkü olan âlât-ı mezkûre sulbî kebîr oğlu ve hasran vârisi Avram Yahûdiye irsen ba‘de’l-intikāl mesfûr Avram Yahûdi dahi hâlik olup âlât-ı lâzıme-i merkūme sulbî kebîr oğulları ve hasran vârisleri olmamızla karındaşım İsak Yahûdi ile bana mevrûs olup ba‘dehû karındaşım mersûm diğer İsak Yahûdi dahi hâlik olmağla zikr olunan fırın derûnunda mevcûde gedik âlât-ı lâzıme-i ma‘lûmesi ancak bana mevrûs ve ol vechile müstakillen mâlım olup lâkin zikr olunan Yahûdi çörekçi fırını bundan akdem muhterik oldukda arsa-yı sırfa kalıp arsa-yı mezkûrenin ber-mûceb-i temessük-ı mütevellî mutasarrıfı bana izin verüp binâ murâd etmemle gedik âlâtı ber-vech-i muharrer mülk-i mevrûsu olduğunu müş‘ir yedimde sened olmayup atîk senedi dahi muhterik olmağın erbâb-ı vukūfdan istihbâr olunup ba‘dehû mûrisim hâlik-i evvel mersûm İsak Yahûdi’nin üzerinde olan kayd-ı atîki kaleminden ref‘ ve terkīn ve benim ismime kayd ile ber-vech-i meşrûh mülk-i mevrûsum olduğunu mübeyyen yedime sûret i‘tâ buyrulmak bâbında istid‘â-yı inâyet eylediğim i‘lâm buyrulmak matlûbumdur dedikde mersûm Menteş Yahûdi’nin bi’l-cümle takrîr-i meşrûhu vâkı‘a mutâbık idüğü esnâf-ı merkūme kethüdâsı İbrahim Ağa ve Yiğitbaşı Mehmed Usta ve Yazıcı Ali Efendi ve sâir mazbûtü’l-esâmî çörekçi ustaları Müslimîn ile Zahar v. Paroh ve Salamon v. Paroh nâm Yahûdilerin meclis-i şer‘de haber vermeleriyle zâhir ve mütehakkık olmağın bu sûretde mersûmun istid‘âsı ve esnâf-ı merkūmenin ihbârı mûcebince yedine sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 20 L sene [12]37