İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 366 Hüküm no: 349 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Kalpakçı esnafına kalpak ve deri tevzii ilâmı Kalpakçı esnâfının deri tevzî‘i i‘lâmı Ma‘rûz -ı dâ‘i [-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan arzuhâlde mezkûr Âsitâne-i aliyyede kâin bi’l-cümle kalpakçı esnâfının müstakillen Ermeni tâifesi Kâhyası Manil v. Abraham ve müstakillen Rum tâifesi Kâhyası Pavli v. Anaştaş nâm zimmîler ve esnâf-ı merkūmenin Ermeni tâifesinden Gabril ve Simyon ve Mıgırdıç ve Sekyas ve Ohannes ve Serkiz ve Badık ve Kirkor ve Haçador ve Kabno ve Manas ve Avakim ve Takfor ve diğer Manas ve diğer Simyon ve diğer Kirkor ve Dozos ve Anderiyas ve diğer Serkiz ve Kegork ve âhar Kirkor ve âhar Serkiz ve diğer Haçador ve Yoseb ve Mardıros ve Moses ve Artin ve Anparsun ve Begos ve İlya ve diğer Anderiyas ve Avak ve Zakar ve Rum tâifesinden Kosti ve Kostanti ve Aleko nâm zimmîler ve sâirleri hâlâ kürkçübaşı el-Hâc Mehmed Emin Ağa b. Hüseyin hâzır olduğu hâlde bi’t-terâzî du‘âhânemizde ma‘kūd meclis-i şer‘-i enverde esnâf-ı merkūmenin Ermeni ustalarından Mıgırdıç ve Bünyad ve Karabet ve Bâbek ve Rum ustalarından Hristo ve Yorgaki nâm zimmîler muvâcehelerinde bin iki yüz yirmi sekiz senesi Muharremi’l-harâmının on sekizinci günü târihiyle müverrah yedimizde olan bir kıt‘a emr-i âlide tasrîh olunduğu üzere Âsitâne-i aliyye ve mahâll-i ma‘lûmede vâki‘ kalpakcı esnâfından Rum ve Ermeni ve Yahûdi tâifelerinin yüz yirmi iki aded dükkânları olup taşra memleketlerinden tüccâr yediyle vürûd eden kalpak ve derilerini kadîmden berü kürkçübaşı ve kethüdâlarımız mâ‘rifetleriyle değer bahâsıyla fiyatı kat‘ olunduktan sonra her birimizin hâl ve tahammüllerimiz[e] göre gadr ve himâyeden ârî ta‘dîl ve tesviye olunmak beynimizde tevzî‘ ve taksîm ve mâl-ı tüccârı muhafaza içün cümlemiz her birimize kefîl olup tüccârdan kalpak derisini hufyeten iştirâ etmemek mer‘î ve mu‘teber şürût-ı nizâmımızdan iken bir müddetden berü ustabaşılarımız olan mesfûrdan Mıgırdıç ve Bünyad ve Karabet ve Bâbek ve Hıristo ve Yorgaki zimmîler Âsitâne-i aliyyeye vürûd eden kalpak derilerini tüccârı yedinden ahz ve ta‘dîl ve tesviye-i şürûtuna ri‘âyet ederek tevzî‘ etmeyüp zikr olunan fermân-ı âlide hâl [71b] ve tahammüllerine göre zikr olunmuşdur deyü esnâfımızdan kudreti olanlara a‘lâlarını ifrâz-birle tevzî‘ ve fukarâmıza çürük derileri tahmîl ve kendileri dahi beğendikleri a‘lâ derileri alıp diledikleri kimesnelere gālî bahâ ile bey‘ ederek esnâfımız fukarâsının külliyen mağdûriyet ve perîşaniyetimize bâ‘is olmalarıyla suâl olunup mersûmûn ber-vech-i muharrer emr-i âli-i mezkûr mazmûnunu fehm etmeyerek hilâf-ı şürût-ı nizâm hareket etmemek üzere tenbîh olunmak cümlemizin matlûbumuzdur dediklerinde mersûmûn cevâblarında fîmâ ba‘d nizâm-ı kadîmlerine mugāyir amel ve hareket etmemek üzere ta‘ahhüd eylediklerinden sonra ba‘de’l-yevm taşra memleketlerinden Âsitâne-i aliyyeye vürûd eden kalpak derilerine kürkçübaşı ve esnâf-ı mezkûre kethüdâları ve ustabaşıları ma‘rifetleriyle esnâf-ı mezkûrenin cümlesi beyninde ale’s-seviyye tevzî‘ ve taksîm olunmak derciyle hal ve tahammüllerine göre tevzî‘ lafzı ref‘ ve ilkā olunarak emr-i âli-i mezkûrun tekîdini hâvî cümlesi bi’l-ittifâk bir kıt‘a fermân-ı âlîşân sudûru bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî 16 L sene [12]37