İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 365 Hüküm no: 348 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzâz Ohannes v. Anton’un, Mehmed Ağa b. İsa’ya olan borcunun tecil edildiği 22.500 guruş tecîl i‘lâmı Ma‘rûz[-ı dâ‘î-i devlet-i aliyyeleridir ki] Mübârek rikāb-ı müstetâb-ı hazret-i tâcdâriye takdîm olunan işbu arzuhâlde mezkûrü’l-ism Bezzâzistâni Tiftik el-Hâc Mehmed Ağa b. İsa nâm kimesne Çarşamba günü arz odasında huzûr-ı Sadâret-penâhîde ma‘kūd meclis-i şer‘-i enverde sâhib-i arzuhâl Bezzâz Ohannes v. Anton nâm zimmî muvâcehesinde mesfûr Ohannes zimmî zimmetinde cihet-i karz-ı şer‘îden bâ-temessük iki bin altı yüz guruş ve mâlımdan bey‘ ve teslîm eylediğim bir aded şal semeninden zimmetinde alacağım olan dört yüz guruşun üç yüz otuz guruşunu bana edâ ve teslîm etmekle bâkī yetmiş guruş ki cem‘an ciheteyn-i mezkûreteynden mesfûr Ohannes zimmî zimmetinde iki bin altı yüz yetmiş guruş alacak hakkım olmağla meblağ-ı mecmû‘-ı mezkûrdan ancak cihet-i karzdan müdde‘âm olan iki bin beş yüz guruşdan mâ‘adâ şal semeninden bâkī meblağ-ı merkūm yetmiş guruşa ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan mesfûr Ohannes zimmînin zimmetini şürût-ı müfsideden ârî sahîhan ibrâ ve iskāt eylediğimde mesfûr Ohannes zimmî dahi meblağ-ı mezbûr içün beş sene müddetde sana bilâ-devr-i murâbaha olmak üzere def‘ ve teslîm eyledim deyü benden da‘vâ edüp külliyen inkâr eylediğim iki bin guruşa ve kezâlik işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan benim zimmetimi şürût-ı müfsideden ârî sahîhan ibrâ ve iskāt ve her birimiz ber-vech-i muharrer âharın ibrâsını kabûl eyledikden sonra mesfûr Ohannes zimmî ibrâdan müstesnâ cihet-i karzdan zimmetinde bana deyni olan meblağ-ı mezbûr iki bin beş yüz guruşun dört yüz yetmiş beş guruşunu bana edâ ve teslîm ben dahi yedinden ahz ü kabz ve istîfâ etmemle bâkīsi olan iki bin yirmi beş guruşunu edâya kudreti olmadığı ma‘lûm olmağla meblağ-ı bâkī-i mezkûru dahi her ne zamân mesfûra vüs‘at-i hâl zuhûr ederse bana edâ etmek üzere imhâl ve tehîr eyledim deyü tarafeynin bi’l-cümle ikrâr ve tasdîkleri tescîl ve İstanbul Mahkemesi’nden huzûr [-ı âlîlerine i‘lâm olundu.] Fî 14 L sene [12]37