İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 367 Hüküm no: 351 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafından Pabuççu Artin ve Karaoğlan Mıgırdıç’ın kürek cezasına çarptırılması Dikici esnâfından 2 nefer zimmîyi küreğe vaz‘ı i‘lâmı Ma‘rûz-ı dâ‘î [-i devlet-i aliyyeleridir ki] Mahmiye-i İstanbul’da ve bilâd-ı selâse ve tevâbi‘lerinde kâin bi’l-cümle dikici esnâfının dikicibaşıları olan Çizmeci Ali Ağa ve mestçiler yiğitbaşısı Mehmed Ağa ve Mestçi diğer Mehmed Ağa ve Çedikçi İbiş Ağa ve Mestçi Abdullah Ağa ve diğer Ali Ağa ve Ahmed Ağa ve Çizmeci İbrahim Ağa ve Salih Ağa nâm Müslimîn ile re‘âyâdan Pabuççu Yapil ve Ohannes ve Artin ve diğer Artin ve Toma ve Haçador Mesiya ve Bedros ve diğer Bedros ve Mıgırdıç ve âhar Artin ve Gabril ve âhar Bedros ve gayrı Bedros ve Markos ve diğer Ohannes ve Serkiz ve Anparsun ve İstefan ve Karabet ve Bağdasar ve diğer Karabet ve Mardros ve diğer Gabril nâm zimmîler ve sâir yüz neferden mütecâviz Müslim ve re‘âyâ meclis-i şer‘-i enverde Pabuccu Artin v. Kirkor ve sahtiyân bey‘ edici Karaoğlan Mıgırdıç v. Manok zimmîler muvâcehelerinde mesfûrân Artin ve Karaoğlan Mıgırdıç nâm zimmîler kendi [hallerinde] olmayup dâimâ hevâdârları olan ba‘zı zimmîler ile ittifâk ederek kâr ve kesblerinden ferâgat ile umûr-ı esnâfa ilkā-yı fesâddan hâlî olmadıkları esnâfımızın ve haffâf esnâfının perîşaniyetimizi mûcib olur hâlden olduğuna binâen her birine bi’d-defa‘ât beynimizde tenbîh eylediğimizde fâriğler olmayup ef‘âl-i sâbıkālarında ısrâr etmeleriyle bi’z-zarûre haffâf esnâfıyla ma‘an mukaddemâ huzûr-ı hâkimde bi’l-muvâcehe teşekkî ile mesfûrânın tedîblerini iltimâs eylediğimizde mesfûrân dahi işbu sene-i mübâreke şehr-i Recebi’l-ferdinin üçüncü günü târihiyle müverrah haffâf esnâfının yedlerinde olan bir kıt‘a i‘lâm-ı şer‘î mantûkunca târih-i mezkûrdan sonra kat‘â umûr-ı esnâfa müdâhale etmeyüp me’lûf oldukları san‘atlarını i‘mâl etmek üzere ta‘ahhüd edüp eğerçi hilâf-ı ta‘ahhüd hareketleri zuhûr eder ise küreğe vaz‘la tedîb olunmağa her biri râzılar olmuşlaridi el-hâletü hâzihî mesfûrân Pabuççu Artin ve Karaoğlan Mıgırdıç zimmîler ef‘âl-i sâbıkālarından fâriğler olmayup yine umûr-ı esnâfa müdâhaleden dâimâ hâlî olmayup esnâf beynine fesâd ilkāsıyla şikākı mûcib hâlâta tasaddî etmeleriyle mesfûrânın tedîb olunmaları bi’l-cümle esnâfımızın matlûbumuzdur deyü bi’l-muvâcehe sû-i hâllerini ifâde ile teşekkî ve mesfûrânın mukaddemâ râzıları olduğu vech üzere ıslâh-ı nefs edinceye değin küreğe vaz‘la tedîblerini iltimâs ve istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 26 L sene [1]237