İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 386 Hüküm no: 368 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Nikola’nın Yuvan v. Marko’ya olan borcunu ödemesi gerektiği 451 guruş 30 para[ya] hüküm Ma‘rûz[-ı dâ‘î-i devlet-i aliyyeleridir ki] İşbu takrîrde mastûrü’l-ism Nemçe re‘âyâsından Yuvan v. Marko nâm müste’men tercümânı tarafından mürsel kapı oğlanı Refayil hâzır olduğu hâlde meclis-i şer‘-i münîrde derûn-ı takrîrde mersûmü’l-ism bahçıvân tâifesinden Andon v. Nikola nâm zimmî muvâcehesinde bin iki yüz otuz beş senesi Recebinin üçüncü günü târihiyle müverrah bir kıt‘a temessük mantûkunca mesfûr Andon zimmî zimmetinde cihet-i karz-ı şer‘îden dört yüz elli altı guruş alacak hakkım olup meblağ-ı mezbûrdan mâ‘adâ bin iki yüz otuz altı senesi Zilhicceti’ş-şerîfesinin beşinci günü târihiyle müverrah diğer bir kıt‘a temessük mantûkunca Beykoz kasabası civârında Yalıköyünde Bakkāl Haçador zimmînin dükkânında yine mesfûr Andon zimmîye mâlımdan nakden beş yüz guruş dahi ikrâz ve teslîm ol dahi yedimden iktirâz ve kabz edüp temessük-ı evvel-i merkūmda muharrer dört yüz elli altı guruş ve meblağ-ı merkūmdan başka temessük-ı sâni-i merkūm mantûkunca beş yüz guruş başka başka zimmetinde cihet-i mezkûreden bana deyni olduğunu mahzar-ı şuhûdda ikrâr dahi ettikden sonra temessük-ı evvelde muharrer dört yüz elli altı guruş ile temessük-ı sânide mezkûr beş yüz guruşun kırk sekiz guruş on parasını bana edâ ve teslîm ben dahi yedinden ahz ü kabz ve temessük-ı evvel-i merkūmu kendüye red etmemle ancak meblağ-ı merkūm beş yüz guruşdan bâkī zimmetinde hakkım olan dört yüz elli bir guruş otuz parayı mesfûr Andon zimmîden taleb ederim deyü ba‘de’d-da‘vâ ve’l-istintak mesfûr Andon zimmî cevâbında ancak temessük-ı evvel-i merkūmda muharrer ber-vech-i meşrûh müdde‘î-i mesfûra edâ eylediği meblağ-ı merkūm dört yüz elli guruşu mukaddemâ iktirâz ve ba‘dehû edâ eylediğini ikrâr mâ‘adâyı külliyen ba‘de’l-inkâr müdde‘î-i müste’men-i mesfûr Yuvan da‘vâ-yı mezkûresini lede’t-tezkiye makbûlü’ş-şehâde idükleri ihbâr olunan Cafer b. Mustafa ve Mustafa b. Mehmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı bâkī-i merkūm dört yüz elli bir guruş otuz parayı müdde‘î-i mesfûr Yuvan müste’mene edâ ve teslîme mesfûr Andon zimmî tenbîh olunduğu İstanbul Mahkemesi’nden [huzûr-ı âlîlerine i‘lâm olundu.] Fî 29 L sene [1]237