İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 387 Hüküm no: 370 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuşadalı Hacı Mehmed Ağa vakfı tevliyetinin Ayşe Sıddıka Hatun bt. Mehmed’e tevcihi Kuşadalı Hacı Mehmed Ağa’nın vakfiyesi nizâ‘ı Ma‘rûz[-ı dâ‘î-i devlet-i aliyyeleridir ki] Zîr-i nezâret-i dâ‘iyânemde olan evkāfdan zikri âtî vâkıfın evlâdından olduğunu iddi‘â eden mu‘arrefetü’z-zât Âişe Sıdıka Hatun bt. Mehmed Emin sâdır olan fermân-ı âlişâna imtisâlen taraf-ı dâ‘iyânemden me’zûnen mürsel kâtib Mehmed Azîz Efendi dâ‘îlerinin bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan fazîletlü Hatîbzâde es-Seyyid Mehmed Derviş Efendi dâ‘îleriyle kasaba-i Beşiktaş’da Sâhilsaray-ı hazret-i şehriyârîde kâin âmin odasında sa‘âdetlü dârü’s-sa‘âdeti’ş-şerîfe ağası hazretleri huzûrlarında akd eyledikleri meclis-i şer‘-i münîrde nezâret-i dâ‘îlerinde olan evkāfdan ashâb-ı hayrâtdan merhûm Kuşadalı Hacı Mehmed Ağa Vakfı’nın ber-vech-i meşrûta hâlâ mütevellîsi evlâd-ı vâkıfdan es-Seyyid Ahmed Halim Ağa b. el-Hâc Mustafa mahzarında hâlâ Haremeyn-i muhteremeyn mütevellîsi Elmas Osman Ağa b. Osman tarafından vekîl-i müsecceli es-Seyyid Abdülvehhab Efendi b. es-Seyyid Abdülhalim hâzır olduğu hâlde merhûm-ı merkūm Kuşadalı Hacı Mehmed Ağa Vakfı’nın tevliyetini bir kıt‘a vakfiye-i ma‘mûlün-bihâsı nâtıka olduğu üzere evvelâ nefsine ba‘dehû aslah evlâdına ve aslah evlâd-ı evlâdına ve aslah evlâd-ı evlâd-ı evlâdına batnen ba‘de batnin ve eğer kendinin batn-ı evvelde aslah evlâdı bulunmaz ise batn-ı sânîde ve yâhud batn-ı sâlisde bulunan aslah evlâdı re’y-i hâkimü’ş-şer‘ ile vakf-ı mezbûra mütevellî olup cihet-i tevliyet yevmî üç akçeye mutasarrıf ola cümle münkarızlar oldukdan sonra mahmiye-i İstanbul’da her kim Haremeyni’ş-şerîfeyn evkāfı mütevellîsi olur ise mütevellî ola ve her sene hâsıl olan gallesinden vazîfe-i mütevellî ve mukāta‘a-i arsa ve Haremeyn fukarasına irsâl olunan bin beş yüz akçe edâ olunup mâ‘adâ galleyi evlâd-ı [76b] evlâd-ı evlâdı ve evlâd-ı evlâd-ı evlâdı batnen ba‘de batnin ve karnen isr-i karnin ile’l-inkırâz ale’l-iştirâki’s-sevi beynlerinde tevzî‘ ve taksîm oluna deyü şart ve ta‘yîn edüp ve mütevellî-i mezbûr es-Seyyid Ahmed Halim Ağa ile li-ebeveyn er karındaşları işbu hâzırân bi’l-meclis es-Seyyid Mehmed Kâmil Ağa ve es-Seyyid Mehmed İzzet Ağa’dan her biri vâkıf-ı mezbûr Kuşadalı Hacı Mehmed Ağa’nın oğlu el-Hâc Ahmed’in oğlu el-Hâc Mustafa’nın oğulları ve ben vâkıf-ı mezbûrun diğer oğlu Ahmed’in oğlu Mehmed Emin’in kızı olup bu vechile ben mezbûrûn gibi evlâd-ı vâkıfdan olmamla bu def‘a vakf-ı mezbûr müsakkafâtından mahmiye-i mezbûrede Balatkapısı hâricinde Karabaş Mahallesi’nde kâin şehriye otuz akçe icâre-i müecceleli bir bâb Yahudhâneyi mütevelli-i mezbûr es-Seyyid Ahmed Halim Ağa müteveffât şerîfe Emine Hatun’un bilâ-veled mahlûlünden lede’l-müzâyede bin sekiz yüz elli guruş mu‘accele ile bi’t-tevliye âhara îcâr edüp mu‘accelesi olup cânib-i vakıf içün makbûzu olan meblağ-ı merkūm bin sekiz yüz elli guruşdan ba‘de ihrâci’l-mesârif bâkī kalan bin üç yüz otuz guruş galle-i vakfın meşrûtun-lehâsından olan evlâd-ı evlâd-ı evlâdından olmamla şart-ı vâkıf üzere hisseme isâbet eden üç yüz otuz üç buçuk guruşu mütevellî-i mezbûr es-Seyyid Ahmed Halim Ağa’dan taleb ederim deyü da‘vâ ettikte mezbûr es-Seyyid Ahmed Halim Ağa dahi cevâbında müdde‘iye-i mezbûrenin vech-i meşrûh üzere evlâd-ı vâkıfdan olup galle-i vakıfdan hisseye müstehıkke olduğunu evvelâ inkâr edüp ba‘dehû tahkīk ve hâzırân-ı mezbûrânın tasdîkleriyle tâyi‘an ve kat‘iyyen ikrâr ve şart-ı vâkıf üzere galle-i vakıfdan hissesine isâbet eden meblağ-ı merkūm üç yüz otuz iki buçuk guruşu müdde‘iye-i mezbûre Âişe Sıddıka Hatun’a def‘ ve teslîm ol dahi ahz ü kabz edüp meblağ-ı merkūmdan mütevellî-i mezbûr es-Seyyid Ahmed Halil Ağa’nın yed ve zimmetinde bir akçe ve bir habbe bâkī kalmadı deyü ba‘de’l-ikrâr fîmâ ba‘d dahi vakf-ı merkūmda galle zuhûrunda mütevellî-i mezbûr ve hâzırân-ı merkūman ve mezbûre Âişe Sıdıka Hatun ber-mûceb-i şart-ı vâkıf iktisâm etmek üzere ittifâk ve her biri âharın evlâdiyetinde tasâduk ile kat‘-ı nizâ‘ eyledikleri kâtib-i mûmâ-ileyh inhâsıyla İstanbul Mahkemesi’nden huzûr [-ı âlîlerine i‘lâm olundu.] Fî 17 Ş sene [1]237