İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 388 Hüküm no: 371 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer Efendi b. Ahmed’in, İbrahim Ağa ve Molla Ömer aleyhine açtığı davada iddiasını ispat edemediğinden muarazadan men edildiği Çifte şîruganhâne havasından tekrar men‘i i‘lâmı Ma‘rûz-ı dâ‘î-i devlet-i aliyyeleridir ki Mübârek rikāb-ı kamer-tâb-ı hüsrevâneye takdîm olunan işbu arzuhâl ashâbından Ürgübî es-Seyyid Ömer Efendi b. es-Seyyid Ahmed nâm kimesne Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i enverde derûn-ı arzuhâlde mezkûrü’l-ism Ürgübî İbrahim Ağa b. İbrahim muvâcehesinde Develi kazâsı ahâlîsinden Molla Ömer b. Yusuf nâm kimesne hâzır olduğu hâlde İstanbul’da Ayazmakapısı dâhilinde Kıbleçeşmesi nâm mahalde kâin çifte yağhâne tâ‘bir olunur ma‘lûmü’l-hudûd bir bâb şîruganhâne derûnunda mevcûd beyne’l-esnâf gedik tâ‘bir olunur âlât-ı lâzıme-i ma‘lûmenin yüz yirmi sehm i‘tibâriyle altmış sehm hisse-i şâyi‘ası min-kıbeli’l-üm ceddim el-Hâc Mahmud nâm kimesnenin yedinde mâlı iken işbu târihden altmış sene mukaddem fevt oldukda hisse-i mezkûresi sulbiye kebîre kızı ve hasren vârisesi vâlidem Şerîfe Fâtıma Hatun’a mevrûs olup ba‘dehû vâlidem mezbûre dahi yedi sene mukaddem fevt olmağın âlât-ı mezkûreden hisse-i merkūmesi sadr-ı kebîr oğulları benimle es-Seyyid Osman ve es-Seyyid Mahmud’a mevrûs olup lâkin ben bin iki yüz sekiz senesi hılâlinde vâlidem müteveffât-ı mezbûrenin hayâtında tarafından vekâlete zikr olunan şîruganhânede mevcûd bin guruş sermâyesiyle ben mâlımdan mezbûr İbrahim Ağa’nın hâli Hasan Ağa b. el-Hâc Mustafa’ya ikrâz ve teslîm eylediğim bin guruş mezbûrun sermâyesi olarak fâide-i hâssanın nısfını bana vermek üzere şerîkleri olup ba‘dehû mezbûr Hasan Ağa dahi bin iki yüz otuz üç senesi hılâlinde fevt oldukda verâseti zevcesi Zeliha Hatun bt. Hüseyin ile kebîre kızı Râbia Hatun ve oğlunun kızı sagīre Raziye bt. Mehmed Emin ve li-ebeveyn kız karındaşı Emine Hatun’a münhasıra ba‘dehû mezbûre Emine Hatun dahi fevt olup verâseti kebîr oğulları mezbûr es-Seyyid İbrahim Ağa ile Mehmed Ağa ve kebîre kızı Asiye Hatun’a ba‘de’l-inhisâr mezbûr İbrahim Ağa âlât-ı lâzıme-i mezkûrenin ber-i‘tibâr-ı merkūm altmış sehm hisse-i şâyi‘asını fuzûlî zabt etmekle zikr olunan altmış sehmden hisse-i irsiyyemi mezbûr İbrahim Ağa’dan ve sermâye-i mezkûreden hissem ile müteveffâ-i mezbûr Hasan Ağa’ya ikrâz eylediğim bin guruş mâlım mezbûr İbrahim Ağa’nın vâzı‘u’l-yed olduğu terekesinden yine mezbûr İbrahim Ağa’dan ve mahrûse-i Galata’ya muzâfe kasaba-i Kasımpaşa’da Cumapazarı nâm mahalde vâki‘ ma‘lûmü’l-hudûd kezâlik bir bâb çifte şîruganhâne derûnunda gedik tâ‘bir olunur âlât-ı lâzıme-i ma‘lûmenin yüz yirmi sehm i‘tibâriyle yirmi iki buçuk sehmi Halem oğlu es-Seyyid Ali’den müşterâ yedimde mâlım iken yirmi iki bin beş yüz akçesi sermâyem ile hisse-i mezkûremi bin iki yüz sekiz senesi hılâlinde mezbûr Molla Ömer’e teslîm etmemle sermâye-i mezkûrem ile hisse-i merkūmemi dahi mezbûr Molla Ömer’den taleb ederim deyü da‘vâ ettikte mezbûr İbrahim Ağa ile hâzır-ı merkūm Molla Ömer’den her biri cevâblarında işbu yedlerimizde tevârîh-i muhtelife ile müverrahlar sekiz kıt‘a i‘lâmat-ı şer‘iyyeler nâtıklar olduğu üzere müdde‘î-i mezbûr es-Seyyid Ömer Efendi husûs-ı mezkûrları ba‘zan asâleten ve ba‘zan vekâleten da‘vâ ve her bir def‘a da‘vâsı vech-i vecih-i şer‘î üzere fasl olunup da‘vâ-yı mezkûreleriyle bî-vech-i şer‘î mu‘ârazadan men‘ olunmuşdur deyü ibrâz eyledikleri sekiz kıt‘a i‘lâmat-ı şer‘iyye-i mezkûre bi’l-muvâcehe kırâet olundukta bi’l-cümle mazmûnları tasdîk ve husûs-ı mezkûrelere müteallık hakkı kalmayup bî-vech-i şer‘î mu‘ârazadan men‘ olunmuş idüğünü ikrâr dahi etmeğin müdde‘î-i mezbûr es-Seyyid Ömer Efendi ikrârı mûcebince da‘vâ-yı mezkûreleriyle mezbûr İbrahim Ağa ile hâzır-ı mezbûr Molla Ömer’e bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 14 min-Şevvâli’l-mükerrem sene 1237 [77a-78a Boş]