İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 390 Hüküm no: 374 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliç voyvodası Ali Ağa b. Mustafa’nın, Salih Efendi b. Veliyüddin ile Tuzcu Hüseyin Ağa aleyhine açtığı buğday davasının henüz neticelenmediği Hınta nizâ‘ı ve Bursa kazâsında mütevellî Âsitâne’ye ihzârı istid‘âsı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arzuhâl ve derkenârlara nazar olundukta derûn-ı arzuhâlde ismi mezkûr Mihaliç Voyvodası el-Hâc Ali Ağa nâm kimesne Mihaliç voyvodası iken zikr olunan Mihaliç kazâsından mahrûse-i Bursa’da vâki‘ Murâdiye İmaretine müretteb Bursa keyli ile beş bin dokuz yüz on beş keyl hıntayı işbu arzuhâl sâhibleri olan Debbâğ el-Hâc Salih Efendi ve Tuzcu el-Hâc Hüseyin Ağa’ya irsâl ve mahrûse-i mezbûrede imâret-i mezkûre mütevellîsi el-Hâc İbrahim Ağa nâm kimesneye teslîme emr eylediğinde mezbûran dahi ba‘de’l-kabz hınta-i mezkûrenin ancak iki bin iki yüz kırk beş keylini mütevellî-i merkūma teslîm mâ‘adâsı olan üç bin altı yüz yetmiş keyli yedlerinde kalmışdır deyü mezbûrân el-Hâc Salih Efendi ve el-Hâc Hüseyin Ağa’yı mahrûse-i mezbûreden bâ-fermân-ı âlî Âsitâne-i aliyyeye ihzâr-birle Çarşamba günü arz odasında huzûr-ı hazret-i Sadr-ı azamîde lede’l-murâfa‘a hınta-i bâkīye-i merkūmeyi mezbûrândan da‘vâ eylediğinde onlar dahi cevâblarında merkūm el-Hâc Ali Ağa’nın imâret-i mezkûre içün beş bin dokuz yüz on beş keyl olmak üzere bize irsâl eylediği hıntayı ber-vech-i muharrer emriyle mütevellî-i merkūm el-Hâc İbrahim Ağa’ya teslîm edecek olduğumuzda mütevellî-i merkūm el-Hâc İbrahim Ağa dahi karındaşı Mustafa Ağa nâm kimesneye teslîm etmek üzere bize emr eylediğinde biz dahi mütevellî-i mezbûrun emriyle karındaşı merkūma tekyîl ve teslîm eylediğimizde hınta-i mezkûre ancak beş bin üç yüz doksan keyl hınta olup ol mikdârını biz kabz ve ber-vech-i meşrûh teslîm etmemizle üzerimize red ve damân lâzım olmayup mâ‘adâsı olan beş yüz yirmi beş keyl hınta noksan olup kabz etmedin deyü ancak beş bin üç yüz doksan keyl hıntayı kabzlarını ve ber-vech-i muharrer emrini ikrâr ve mikdâr-ı makbûzlarını sâniyen mütevellî-i merkūmun emriyle karındaşı merkūm Mustafa Ağa’ya teslîm da‘vâsıyla eyledikleri def‘lerini merkūm el-Hâc Ali Ağa ba‘de’l-inkâr mezbûrân def‘-i meşrûhlarından mütevellî-i merkūmun sâniyen emrini mütevellî-i mezbûr huzûrunda da‘vâ ve isbât etmeleri tarafeyne tefhîm olunup ol vechile faysal verilmemiş olmağla mezbûrân el-Hâc Salih Efendi ve el-Hâc Hüseyin Ağa emr-i mezkûru huzûrunda isbât içün mütevellî-i mezbûr el-Hâc İbrahim Ağa’nın dahi mahrûse-i mezkûreden Âsitâne-i aliyyeye ihzârını istid‘â eyledikleri arzuhâl ve derkenârlardan müstebân olmağın bu sûretde istid‘â olunduğu üzere mütevellî-i merkūmun ihzârı husûs-ı re’y-i sâmîlerine menût idüğü İstanbul Mahkemesi’nden huzûr [-ı âlîlerine i‘lâm olundu.] Fî 6 Za sene 1237