İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 391 Hüküm no: 375 Orijinal metin no: [78b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabib İstirati oğlu Sava ile Dülger Yorgaki oğlu Panayot’un Müslüman olduğu İki nefer mürâhik şeref-i İslâmla müşerref oldukları Ma‘rûz[-ı dâ‘î-i devlet-i aliyyeleridir ki] Arzuhâl eden İstanbul’da Bodrum hanında mütemekkin hazırcı çukacı esnâfından Movlovalı Andon v. Marçelo nâm zimmî meclis-i şer‘-i münîrde sâbıkā vilâyet-i Anadolu’da vâki‘ Ezine Kazdağı nâm-ı diğer İne kazâsı voyvodası derûn-ı arzuhâlde ismi mezkûr Alişân Ağa b. Ömer nâm kimesne muvâcehesinde mezbûr Alişân Ağa’nın yedinde olan derûn-ı arzuhâlde tahrîr olunduğu üzere Bahr-ı sefîd’de vâki‘ Midilli cezîresinde kâin Movlova kazâsına tâbi‘ Kastero karyesi re‘âyâsından Tabib İstirati zimmînin oğlu ve hâlâ tahmînen on üç yaşında olmağla te‘akkul-i dîn edüp İslâmını ikrârı şer‘an mu‘teber olan mukaddemâ Sava nâmında olup hâlâ Mehmed nâm mürâhik ile yine karye-i mezbûre re‘âyâsından Dülger Yorgaki zimmînin oğlu ve hâlâ tahmînen on dört yaşında olmağla te‘akkul-ı dîn edüp kezâlik İslâmını ikrârı şer‘an mu‘teber olan mukaddemâ Panayot nâmında olup hâlâ Ahmed Hurşid nâm mürâhik hâzır oldukları hâlde mürâhikān-ı mezbûrân Mehmed ve Ahmed Hurşid’in babaları ve kendileri benim akrabâmdan olup mezbûrânın asıllarına rık târî olmamış ve her biri hürrü’l-asl iken merkūm Alişân Ağa merkūmânı zikr olunan Eyne kazâsında mesfûr Dülger Yorgaki zimmî ile yanına alıp ba‘dehû Lapseki Voyvodası oldukda mürâhikān-ı mezbûrânı ma‘an Lapseki’ye getürüp hâlâ esîrimdir deyü âhara bey‘ murâd eylediğini ben haber almamla mücerred akrabâmdan olduklarına binâen hürrü’l-asl olan merkūmân bana teslîm olunmak matlûbumdur deyü da‘vâsında mersûm Andon zimmînin hasm-ı şer‘î olamadığı kendüye tefhîm ve ol vechile bî-vech-i şer‘î mu‘ârazadan men‘ olunduğundan sonra tahkīk-i madde içün merkūm Âlîşân Ağa istintak olundukta cevâbında mürâhikān-ı mezbûrân benim esîrim olmayup ve kimesneye hâşâ bey‘ murâd etmediğinden gayrı mezbûrândan her biri hürrü’l-asl re‘âyâ evlâdından oldukları hâlde zikr olunan Eyne kazâsına mesfûr Dülger Yorgaki zimmî ile işbu târih-i i‘lâmdan altı ay mukaddem benim yanıma gelüp bir ay mürûrunda her biri huzûr-ı Müslimînde bi’t-tav‘ ve’r-rızâ cemî‘ edyân-ı bâtıladan teberrî ve ityân-ı kelimeteyn-i şehâdeteyn ile dîn-i İslâm’ı kabûl edüp mukaddemâ Sava nâmında olan mürâhik-ı mezbûr talebiyle Mehmed ve Panayot nâmında olan mürâhik-ı mezbûr kezâlik talebiyle Ahmed Hurşid tesmiye olunmağla ol vechile mezbûrândan her biri esîr olmayup hürrü’l-asl ve Müslimîn olmalarıyla ben dahi evlâd mesâbesinde terbiye içün indimde imsâk eyledim dedikde mürâhikān-ı mezbûrânın ber-vech-i muharrer hürriyetlerini ve târih-i merkūmda şeref-i İslâm’la müşerrefler olduklarını tekrar zikr olunan İne kazâsı ahâlîsinden Mestâc Ağa demekle ma‘rûf Turnacı Mustafa Ağa b. Mehmed ve Yeğenoğlu es-Seyyid Mehmed Ağa b. Mustafa nâm kimesneler dahi bi’l-muvâcehe alâ-tarîkı’ş-şehâde haber verdiklerinde mürâhikān-ı mezbûrân Mehmed ve Ahmed Hurşid’den her biri dahi ber-vech-i muharrer hürriyetlerini ve mukaddemâ ve hâlâ bi’t-tav‘ ve’r-rızâ cemî‘ edyân-ı bâtıladan teberrî ve meclis-i şer‘de dahi kelimeteyn-i şehâdeteyni tekellüm ve şeref-i İslâm ile müşerrefler olduklarını her biri ikrâr ve tasdîk etmeleriyle mûcebince mezbûrânın hürriyet-i İslâmları şer‘an mütehakkık olmağın mezbûrân [79a] Mehmed ve Ahmed Hurşid’in kemâkân li-ecli’t-terbiye merkūm Âlişân Ağa yanında ibkāları re’y-i âlîlerine menût idüğü İstanbul Mahkemesi’nden huzûr-ı âlîlerine i‘lâm olundu. Fî 6 Za sene 1237