İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 396 Hüküm no: 380 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Usta b. Ebûbekir ile Ohannes v. Aslan’ın sulh oldukları İki yüz guruş[a] sulh Ma‘rûz[-ı dâ‘î-i devlet-i aliyyeleridir ki] Sâhib-i arzuhâl tüccâr tâifesinden Ohannes v. Aslan nâm zimmî meclis-i şer‘-i münîrde İstanbul’da Kadırga Limanı kurbünde Dizdâriye Mahallesi’nde vâki‘ ma‘lûmü’l-hudûd bir bâb menzile bâ-temessük-ı mütevellî bi’l-icâreteyn mutasarrıf olan Fazlı Paşa’da boyacı ustalarından derûn-ı arzuhâlde mezkûrü’l-ism Mehmed Usta b. Ebûbekir nâm kimesne muvâcehesinde mezbûr Mehmed Usta’nın bi-şartü’r-rücû‘ emriyle menzil-i mezkûru hedm ve enkāz-ı mevcûdesiyle iktizâ eden kereste ve mismar ve kireç ve horasan ve tuğla ve edevât-ı sâire ve ücret-i amele benim üzerime olmak üzere müceddeden bir bâb menzil binâ ve inşâsına bir kıt‘a müfredât defteri nâtık olduğu üzere mâlımdan iki bin iki yüz doksan altı buçuk guruş sarf etmemle masrûfum olan meblağ-ı mezkûrun bin dokuz yüz guruşunu mukaddemâ bana edâ ve teslîm ben dahi yedinden ahz ü kabz ve istîfâ edüp bâkīsi olan üç yüz doksan altı buçuk guruşu dahi taleb ederim deyü tasaddî eylediğim da‘vâmdan bâ-vesâtet-i muslihîn mezbûr Mehmed Usta ile bi’t-tav‘ ve’r-rızâ kat‘an li’l-husûme an inkâr iki yüz guruş üzerine ba‘de akdi’l-musâlaha ve’l-kabûl bedel-i sulh-i mezkûrdan mâ‘adâ üç yüz doksan altı buçuk guruşa varınca ziyâdesi olan yüz doksan altı buçuk guruşa ve bi’l-cümle menzil-i mezkûr husûsunda ziyâde masrûf müdde‘âsına ve işbu târihe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini mutlakan ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dediğini mezbûr Mehmed Usta tasdîk ve ber-vech-i meşrûh kabûlü hâvî ibrâ eylediğini ve ibrâdan müstesnâ bedel-i sulh-i mezkûr iki yüz guruş zimmetinde müdde‘î-i mezbûra sahîhan deyni olduğunu tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi bedel-i sulh-i merkūm iki yüz guruşun bi’t-taleb müdde‘î-i mersûm Ohannes zimmîye edâ ve teslîmiyle mezbûr Mehmed Usta ilzâm olduğu İstanbul Mahkemesi’nden huzûr [-ı âlîlerine i‘lâm olundu.] Fî 9 Za sene 1237