İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 395 Hüküm no: 379 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İplikçizâde Ahmed Ağa b. Süleyman’ın nizama aykırı davranması sebebiyle kapan tüccarlığından çıkarıldığı “Kapan tüccârından hurûcunu iltimâs eyledikleri Zahîre nâzırı atûfetlü efendinin i‘lâmı bâlâsına sâdır olan fermân-ı âlî mûcebince işbu i‘lâmın kaydı darb olunmuşdur. Fî-18 M sene [12]38 [Mühür] Ma‘rûz[-ı dâ‘î-i devlet-i aliyyeleridir ki] Hâlâ reisler kethüdâsı Mehmed Atâullah Ağa ve mahmiye-i İstanbul’da kâin kapan-ı dakīk tüccârından es-Seyyid el-Hâc Veliyüddin Ağa ve Hatîbzâde es-Seyyid el-Hâc Hasan Ağa ve Arabacı el-Hâc İbrahim Ağa ve Ellialtı el-Hâc Mustafa Ağa ve Çetecizâde es-Seyyid İbrahim Ağa ve Kozlucalızâde el-Hâc İbrahim Ağa ve Gökçezâde es-Seyyid el-Hâc Osman Ağa ve Bağdâdîzâde İbrahim Ağa ve Kırımîzâde es-Seyyid el-Hâc Musa Ağa ve Kösemzâde el-Hâc Osman Ağa ve Sekbanbaşızâde el-Hâc Osman Efendi ve es-Seyyid el-Hâc Mehmed Said Efendi ve Çörekçiler kethüdâsı Ali Ağa ve İbrailli Ömer Ağa ve Yürüzâde Mehmed Sâdık Ağa ve Küçük es-Seyyid el-Hâc İsmail Ağa ve Odunkapılı el-Hâc Halil Ağa ve Çobanoğlu el-Hâc İbrahim Ağa ve el-Hâc Ali Efendi ve es-Seyyid el-Hâc Hasan Efendi ve Yankooğlu el-Hâc Mustafa Ağa ve Tığlıoğlu Mahmud Ağa ve Bayram Hüseyin Ağa ve Kırımî es-Seyyid Hasan Ağa ve Kilisli Hüseyin Ağa ve el-Hâc Mustafa Ağa ve Hamza Reis oğlu el-Hâc Derviş Ağa ve Varilcioğlu Mehmed Emin Kapudan ve sâirleri meclis-i şer‘-i münîrde yine kapan-ı merkūm tüccârından İplikçizâde el-Hâc Ahmed Ağa b. el-Hâc Süleyman muvâcehesinde merkūm el-Hâc Ahmed Ağa bir müddetden berü kapan-ı merkūm tüccârından olup lâkin kendi hâlinde olmayup dâimâ kapan-ı merkūm ticâretinde olan nizâm-ı kadîme mugāyir hareket ve cümleye muhâlefet ederek nizâmımızın ihtilâlini mûcib ef‘âle tasaddî ile cümlemizi rencîdeden hâlî olmamağla kendüye bi’d-defa‘ât tenbîh olundukta bir vechile ısgā etmeyüp yine ef‘âl-i sâbıkāsında ısrâr etmekle mezbûrun bu vechile ısrârı bi’l-cümle tüccâra ve ibâdullâha muzır olmağın fîmâ ba‘d merkūm el-Hâc Ahmed Ağa kapan-ı merkūm tüccârlığından hurûc edüp ticâret-i âhara şürû‘ eylemek üzere kendüye tenbîh ve ol vechile nizâm-ı kadîmimiz vikāye olunmak cümlemizin matlûbumuzdur deyü bi’l-muvâcehe teşekkî ve ticâret-i merkūmeden hurûcunu iltimâs ve istid‘â eylediklerinde ol dahi âhar ticârete şürû‘ etmek üzere râzı olduğu İstanbul Mahkemesi’nden huzûr [-ı âlîlerine i‘lâm olundu.] Fî 15 Za sene 1237”