İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 397 Hüküm no: 383 Orijinal metin no: [79b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Ahmed’in tütün dükkânı gediğini Ebûbekir Ağa b. Mehmed’e sattığı Tütüncü dükkânına sûret i‘tâsı Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe kasaba-i Beşiktaş’da Sinanpaşa Mahallesi’nde sâkin eş-Şeyh İsmail Hakkı Efendi b. el-Hâc Salih meclis-i şer‘-i münîrde Tonbakücü el-Hâc Ebûbekir Ağa b. el-Hâc Mehmed mahzarında mahmiye-i İstanbul’da Tahtakale civârında şekerci dükkânı karşısında kurukahveci ve tonbekücü dükkânları beynlerinde kâin şehriye dokuz guruş on para kadîm kirâlı iki kepenk bir bâb tütüncü dükkânı derûnunda mevcûde maden kaleminde Molla Ahmed ismine mukayyed beyne’l-esnâf gedik tâ‘bir olunur ber-mûceb-i defter-i müfredât âlât-ı lâzıme-i ma‘lûme akd-i âti’z-zikrin sudûruna değin bey‘ u şirâ ve irs-i şer‘le tedâvül olunarak yedimde bâ-hüccet-i şer‘iyye şirâen mâlım ve mülküm olmağla ben ber-minvâl-i muharrer mâlik olduğum âlât-ı lâzıme-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî merkūm el-Hâc Ebûbekir Ağa’ya dokuz bin guruş semen-i makbûza bey‘ ve temlîk ve teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup merkūm el-Hâc Ebûbekir Ağa’nın mâl-ı müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk tütüncü esnâfının kethüdâ vekîli es-Seyyid Mustafa Ağa ve Yiğitbaşı es-Seyyid Abdullah Çelebi ve tüccârdan Mehmed Şâkir Ağa ve İmâmzâde Ahmed Ağa ve sâirleri hâzır oldukları hâlde âlât-ı lâzıme-i mezkûre bâlâda tahrîr olunduğu üzere kaleminde merkūm Molla Ahmed [ismine] mukayyed olup bâ-hücec-i şer‘iyye bey‘ u şirâ olunarak kaleminde olan kayd-ı atîki hâlâ terkīn olunmamağın hâzirûn-ı merkūmûndan lede’l-istihbâr âlât-ı mezkûrenin kaleminde merkūm Molla Ahmed ismine olan kayd-ı atîki ref‘ ve terkīn ve benim ismime tashîhan kayd-birle yedime bir kıt‘a sûret i‘tâ [80a] olunmak matlûbumdur deyü mezbûr el-Hâc Ebûbekir Ağa istid‘â-yı inâyet etmekle fi’l-hakika hâl mezbûr el-Hâc Ebûbekir Ağa’nın takrîrine mutâbık idüğü hâzirûn-ı mezbûrûnun haber vermeleriyle mütehakkık olmağın bu sûretde âlât-ı mezkûrenin kaleminde merkūm Molla Ahmed ismine olan kayd-ı atîki ref‘ ve terkīn-birle mezbûr el-Hâc Ebûbekir Ağa ismine tashîhan kayd ve yedine sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 20 Za sene [1]237